Búgin qaladaǵy «Kórme» ortalyǵynda Shymkent qalasy, Túrkistan, Jambyl jáne Qyzylorda oblystary taýar óndirýshileriniń óńiraralyq kórme-jármeńkesi bastaldy. Kórmede hımııalyq, mashına jasaý, tamaq, jeńil, jıhaz ónerkásibi, qurylys materıaldary men agro-ónerkásip kesheniniń, jalpy 100-den astam kásiporyn óz ónimderin usynýda.
20-21 naýryz aralyǵyna josparlanǵan kórme-jármeńkeniń basty maqsaty – otandyq taýar óndirýshilerdiń joǵary sapaly jáne básekege qabiletti ónimderimen keńinen tanysý, jańa seriktester izdeý jáne ózara tıimdi kelisimder jasasý. Óńiraralyq is-shara otandyq óndirýshilerdi nasıhattaýǵa baǵyttalǵan jáne kásiporyndardy damytýǵa, jańa tehnologııalardy engizýge jáne ımportty almastyratyn ónimderdiń assortımentin arttyrýǵa yntalandyrýdy kózdeıdi.
Shymkent qalasynyń ákimi Murat Áıtenov Jambyl jáne Qyzylorda oblystarynyń áleýetti kásiporyndarynyń ónimderimen tanysyp, kórmeniń jumysyna sáttilik tiledi. Shahar basshysy otandyq ónimderdi tanytý, seriktestikti nyǵaıtýda mundaı kórme alańdardyń mańyzy zor ekenin atap ótti.
Aıta ketsek, kásiporyndardyń qatarynda «Rahat-Shymkent» JShS (kondıterlik ónimder), «Shymkentmaı» AQ (ósimdik maı, maıonez, tuzdyq, sabyn), «VIZıT» alkogolsiz sýsyndar zaýyty» JShS (alkogolsiz sýsyndar), «Bal Tekstıl» JShS (kilemder jáne kilem buıymdary), «Shymkent-Kashemır» JShS (toqyma buıymdary (túıe júninen jasalǵan kıim jáne shulyq) jáne basqa qalanyń tanymal kompanııalary bar. Sonymen qatar, kórshi Túrkistan, Jambyl jáne Qyzylorda oblystarynyń ónerkásiptik kásiporyndary óz ónimderin tanystyrýda.
