شىمكەنتتە قازاقستان حالقى اسسامبلەياسىنىڭ مۇشەلەرى ا.اسقاروۆ اتىنداعى دەندروساياباققا 100 ءتۇپ اعاش وتىرعىزدى.
ۇلىستىڭ ۇلى كۇنى — ناۋرىز مەيرامىن مەرەكەلەۋدە قالالىق قحا تاراپىنان ءتۇرلى يگى باستامالار قولعا الىنعان. بۇگىنگى «تازا قالا» اكتسياسى اياسىندا ءوتىپ جاتقان اعاش وتىرعىزۋ ءىس-شاراسى وسىنىڭ ءبىر كورىنىسى.
—شىمكەنتتەگى ەتنومادەني بىرلەستىكتەردىڭ مۇشەلەرى دە ناۋرىز مەرەكەسىن ەرەكشە جاعدايدا قارسى الىپ، قازاق حالقىنىڭ سالت-داستۇرلەرىن جاڭعىرتۋ، بەيبىتشىلىكتى ساقتاۋ، قايىرىمدىلىقتى جانە ەتنوسارالىق قاتىناستار مادەنيەتىن دامىتۋ، قوعامداعى دوستىق پەن سەنىمدى نىعايتۋ، قالا اۋماعىن اباتتاندىرۋ شارالارىمەن جالعاستىرۋدى ماقسات ەتىپ وتىر. بيىل ا.اسقاروۆ اتىنداعى دەندروساياباقتا قحا مۇشەلەرىنە ارنالعان «دوستىق» اللەياسى ءۇشىن جەر ءبولىندى. بۇگىن قالامىزداعى 17 ەتنو-مادەني بىرلەستىكتىڭ توراعالارى مەن قوعامدىق قۇرىلىم وكىلدەرى ارنايى بولىنگەن جەرگە اعاش وتىرعىزۋدى باستاپ كەتتى. ءبىز العاشقى كەزەڭدە 100 ءتۇپ كوشەت وتىرعىزۋدى جوسپارلاپ وتىرمىز، - دەدى شىمكەنت قالاسىنىڭ قحا حاتشىلىعىنىڭ مەڭگەرۋشىسى مۇحتار اقجىگىتۇلى.
كوشەت وتىرعىزۋ ءىسى قالانى كوركەيتۋمەن قاتار قورشاعان ورتاعا، تابيعاتقا، ادامزاتقا دا جاسالعان قايىرىمدىلىق دەگەندى العا تارتقان شەشەن-ينگۋش ەتنومادەني بىرلەستىگىنىڭ توراعاسى رامازان ماتاەۆ شىمكەنتتىكتەردى كوبىرەك تال ەگۋگە شاقىردى.
—ناۋرىز — بەيبىتشىلىك پەن دوستىقتىڭ، مولشىلىقتىڭ مەرەكەسى. وسى مەيرام قارساڭىندا اعاش وتىرعىزۋ اكتسياسىن ۇيىمداستىرۋ قۇپتارلىق ءىس. ءار ادام جوق دەگەندە ءبىر اعاش ەگۋ كەرەك. ال، 10 كوشەت وتىرعىزسا جەر-انا الدىنداعى مىڭ پارىزىنىڭ ءبىرىن ورىنداعانى. سوندىقتان بارشا قالا تۇرعىندارىن ءوز قالامىزدىڭ تابيعاتىن جاقسارتۋ، بولاشاق ۇرپاققا ۇلگى ەتۋ ءۇشىن كوبىرەك اعاش وتىرعىزۋعا شاقىرامىن،—دەدى ەتنومادەني بىرلەستىك توراعاسى.
ۇيىمداستىرۋشالاردىڭ سوزىنشە، تاڭنان باستاۋ العان كوشەت وتىرعىزۋ اكتسياسى كەشكە دەيىن جالعاسىن تاپپاق.
