شىمكەنت قالاسىندا الەۋمەتتىك ماڭىزى بار ازىق-تۇلىك تاۋارلارىنىڭ باعاسىن باقىلاۋ، باعا تۇراقتىلىعىن ساقتاۋ بويىنشا كەزەكتى ءباسپاسوز-تۋرى ۇيىمداستىرىلدى. الدىمەن باق وكىلدەرى، جۇمىسشى توپ شاياحمەتوۆ كوشەسىندەگى Qaz et الەۋمەتتىك دۇكەنىندەگى باعانى باقىلادى. وندا سيىر ەتى 2300 تەڭگەدەن ساتىلىپ جاتىر. ول – الەۋمەتتىك باعا. ساۋدا نۇكتەسى 2022 جىلدىڭ جەلتوقسان ايىندا اشىلعان بولاتىن.
شاھاردا تاۋارلاردىڭ باعاسىن نەگىزسىز وسىرمەۋ جونىندە بىرقاتار ءىرى ساۋدا ورىندارىمەن كەلىسىمدەر جاسالعان. بۇگىندە «ماگنۋم» ساۋدا جەلىسىندە الەۋمەتتىك ماڭىزى بار 19 تاۋار بەلگىلەنگەن باعادا ساتىلۋدا. ماسەلەن، ارزانداتىلعان تاۋارلار قاتارىندا نان – 92 تەڭگە، شەكەر – 445 تەڭگە، پياز – 225, ءسابىز 180 تەڭگە، كارتوپ 180 تەڭگە، كۇنباعىس مايى 860 تەڭگە دەپ بەلگىلەنگەن.
قالالىق اۋىل شارۋاشىلىعى جانە ۆەتەريناريا باسقارماسى ازىق-تۇلىك قاۋىپسىزدىگىن قامتاماسىز ەتۋ ءبولىمىنىڭ باسشىسى جاندوس حانيەۆتىڭ ايتۋىنشا، ءبىرىنشى قاجەتتى ازىق-تۇلىك تاۋارلارىنىڭ باعاسى تۇراقتى باقىلاۋدا. قالا بويىنشا ازىق-تۇلىك تاپشىلىعى جوق.
جەرگىلىكتى كاسىپكەرلەرمەن 1 جىلعا كەلىسىمشارت ءتۇزىلىپ، ولارعا اينالىم قارىز قاراجاتى بەرىلگەن. بۇگىندە قالادا 100-دەن استام ساۋدا نىساندارىندا الەۋمەتتىك ماڭىزى بار ازىق-تۇلىك تاۋارلارى تىزبەسى بەلگىلەنگەن.
بەلگىلەنگەن باعا ءار توقسان سايىن وزگەرىپ وتىرادى. ءار توقساندا كوميسسيا شەشىمىنە سايكەس، نارىقتاعى باعادان 10-15 پايىز تومەن باعادا بەكىتىلەدى. شاھاردا جالپى الەۋمەتتىك ماڭىزى بار ازىق-تۇلىك تاۋارلارىنىڭ باعاسىنا كۇندەلىكتى مونيتورينگ جۇرگىزىلۋدە.
