Shymkent qalasynda áleýmettik mańyzy bar azyq-túlik taýarlarynyń baǵasyn baqylaý, baǵa turaqtylyǵyn saqtaý boıynsha kezekti baspasóz-týry uıymdastyryldy. Aldymen BAQ ókilderi, jumysshy top Shaıahmetov kóshesindegi Qaz et áleýmettik dúkenindegi baǵany baqylady. Onda sıyr eti 2300 teńgeden satylyp jatyr. Ol – áleýmettik baǵa. Saýda núktesi 2022 jyldyń jeltoqsan aıynda ashylǵan bolatyn.
Shaharda taýarlardyń baǵasyn negizsiz ósirmeý jóninde birqatar iri saýda oryndarymen kelisimder jasalǵan. Búginde «Magným» saýda jelisinde áleýmettik mańyzy bar 19 taýar belgilengen baǵada satylýda. Máselen, arzandatylǵan taýarlar qatarynda nan – 92 teńge, sheker – 445 teńge, pııaz – 225, sábiz 180 teńge, kartop 180 teńge, kúnbaǵys maıy 860 teńge dep belgilengen.
Qalalyq aýyl sharýashylyǵy jáne veterınarııa basqarmasy azyq-túlik qaýipsizdigin qamtamasyz etý bóliminiń basshysy Jandos Hanıevtiń aıtýynsha, birinshi qajetti azyq-túlik taýarlarynyń baǵasy turaqty baqylaýda. Qala boıynsha azyq-túlik tapshylyǵy joq.
Jergilikti kásipkerlermen 1 jylǵa kelisimshart túzilip, olarǵa aınalym qaryz qarajaty berilgen. Búginde qalada 100-den astam saýda nysandarynda áleýmettik mańyzy bar azyq-túlik taýarlary tizbesi belgilengen.
Belgilengen baǵa ár toqsan saıyn ózgerip otyrady. Ár toqsanda komıssııa sheshimine sáıkes, naryqtaǵy baǵadan 10-15 paıyz tómen baǵada bekitiledi. Shaharda jalpy áleýmettik mańyzy bar azyq-túlik taýarlarynyń baǵasyna kúndelikti monıtorıng júrgizilýde.
