اقمولا وبلىسى، اقكول اۋدانىنىڭ تۇرعىنى امانتاي ەرقانات باسى ءبۇتىن قۇلدىق قامىتىنا تاڭىلعانىن ايتىپ، قر پرەزيدەنتى قاسىم-جومارت توقاەۆتان كومەك سۇرادى، دەپ حابارلايدى "Aدىرنا" ۇلتتىق پورتالى.
كىسى بالاسىنان ءزابىر كورگەن ازاماتتىڭ ايتۋىنشا، ول ءبىر جارىم جىل قورعالجىن اۋدانىندا تۇرىپ، ودان كەيىن ستەپنوگورسك قالاسىنا كەتەدى. ستەپنوگورسك قالاسىندا جىلقى باعىپ، تاي ۇيرەتەدى.
الايدا، بۇرىنعى جۇمىس بەرۋشى شارۋا يەسى ونى تاۋىپ الىپ، توپەلەپ، اياۋسىز سوققىعا جىعىپ، قورعالجىن اۋدانىنداعى ەلدى-مەكەندە قول-اياعىن بايلاپ ۇستاعان.
ىڭعايىن تاۋىپ "قۇلدىقتان" قاشىپ شىققان ازامات ءتارتىپ ساقشىلارىنا ارىزدانعان. قازىر پوليتسيا وسى دەرەك بويىنشا قىلمىستىق ءىس قوزعادى.
«سول جەردە جۇمىس ىستەپ جۇرگەن جەرىمنەن مەنى بۇرىنعى باستىعىم م. اتتى ازامات پەن «سوترۋدنيكتەر» كەلىپ، ەشقانداي ەسكەرتۋسىز، ادامداردىڭ كوزىنشە ۇرىپ-سوعىپ، ءوز كولىگىنە وتىرعىزىپ، قورعالجىن اۋدانىنا الىپ كەتتى.
مەنى قيناپ، دەنەمە تاڭبا سالعان كەزدە جانىمدا ءتورت كىسى بولدى. شەشەممەن سويلەستىرگەن كەزدە قاسىمدا كىسىلەر وتىراتىن. مەن سول ءۇشىن ول جەردەن قاشىپ كەتتىم. ارىز جازدىم. ولار بىزدە گەنەرال بار دەپ قورقىتتى. ءتىپتى اكە-شەشەمدى قورقىتىپ جاتىر. قۇرمەتتى قاسىم-جومارت توقاەۆ ءسىز ايتتىڭىز عوي جاڭا قازاقستان قۇرامىز دەپ. ال مۇنداي ماسقاراعا قالاي جاۋاپ بەرۋگە بولادى»، - دەدى ەرقانات.
بەينەحابارلاما اۆتورى جەكە باسىنا قاتىستى داۋلى ماسەلەنىڭ زاڭ اياسىندا شەشىمىن تاۋىپ، كىنالىلەردىڭ جازالاناتىنىنا كامىل سەنەدى. ول قازاقتىڭ بالاسىن قيناپ ۇستاعانى ءۇشىن ءار ادام جاۋاپ بەرۋى كەرەك دەپ سانايتىنىن دا جەتكىزدى.
"ادىرنا" ۇلتتىق پورتالى
