جۋىردا قازاقستان حالىق پارتياسى توراعاسى ورىنباسارى سەرىكقالي مۇقاشەۆ ءوزىنىڭ باسشىسى ەرمۇحامەد ەرتىسباەۆقا قاتىستى الەۋمەتتىك جەلىدە اتىشۋلى جازبا جاريالادى.
سەرىكقالي مۇقاشەۆ ءوز جازباسىندا ەرمۇحامەت ەرتىسباەۆقا سەنىمسىزدىك ءبىلدىرىپ، پارتيا توراعاسىن قايتا سايلاۋ تۋرالى ماسەلە كوتەرمەكشى بولعانىن مالىمدەدى.
Adyrna.kz ۇلتتىق پورتالى پارتيانىڭ ءباسپاسوز قىزمەتىنە حابارلاسىپ، ءمان-جايدى بىلگىسى كەلگەن. الايدا قحپ داۋلى وقيعاعا بايلانىستى ءلام-ميم دەمەدى.
بۇگىن ءماجىلىستىڭ جالپى وتىرىسىندا قحپ اتىنان ءماجىلىس دەپۋتاتى بولعان يسلام سۇڭعاتقا ەرمۇحامەت ەرتىسباەۆقا قاتىستى سۇراق قويدىق. جاس دەپۋتات مانداتقا قول جەتكىزگەن باسشىسىنا قاتىستى سۇراققا ساق جاۋاپ بەردى.
– سەرىكقالي مۇقاشەۆ الەۋمەتتىك جەلىدە پارتيانىڭ ىشىندەگى الاۋىزدىق تۋرالى ماسەلە كوتەردى. بۇل ماسەلەمەن تانىسسىز با؟
– قانداي الاۋىزدىق تۋرالى ايتىپ جاتىرسىز؟ پارتيادا ەشقانداي كەلىسپەۋشىلىك جوق.
– سەرىكقالي مۇقاشەۆ جالعان اقپارات تاراتىپ جاتىر ما؟
– ول ناقتى نە نارسە ايتىپ جاتقانىن بىلمەيمىن. پارتياداعى كەز كەلگەن شەشىم كوللەگيالدىق ورگاندا شەشىلەدى. دەموكراتيالىق تسەنتراليزم شەڭبەرىندە جاسالىپ جاتىر.
– مۇقاشەۆتىڭ جازباسىن وقىمادىڭىز با؟
– ول ماتىنمەن تولىقتاي تانىسقانىم جوق. نە سەبەپتى ونداي پىكىر جازىپ جاتقانىن بىلمەيمىن. ول ونىڭ سۋبەكتيۆتى پىكىرى بولۋى مۇمكىن. كەز كەلگەن شەشىم پارتيالىق ۇيىم بولعاندىقتان دەموكراتيالىق تسەنتراليزمگە نەگىزدەلەدى. ءبىر ادامنىڭ جەكە ويىنا باعىنباۋى ءتيىس.
– سەرىكقالي مۇقاشەۆ پارتيا توراعاسىنىڭ ىشتەگى ءتارتىپتى بۇزىپ جاتقانى تۋرالى جازدى. جالپى ەرتىسباەۆتىڭ پارتياداعى رولىنە قاتىستى ءسىز نە ايتاسىز؟
– جالپى ءوزىم پارتيا قاتارىندا 7 جىلدان بەرى جۇمىس ىستەپ كەلەمىن. ناقتىراق ايتسام جيىرما ءبىر جاسىمنان بەرى پارتيادا ەڭبەك ەتىپ جاتىرمىن. ورتالىق اپپاراتقا ءبىر جارىم جىل بۇرىن جۇمىسقا كەلدىم. جالپى قازىر قحپ بولىپ جاتقان وزگەرىستەر پارتيانىڭ تانىمالدىعى مەن ءىشى جۇمىستارىنا وڭ اسەرىن تيگىزۋدە.
– پارتيادان جامبىل احمەتبەكوۆ، عازيز قۇلاحمەتوۆ سەكىلدى ازاماتتار كەتتى. پارتيانىڭ ىشىندە الاۋىزدىق بار سەكىلدى...
– ولاردىڭ ناقتى قانداي سەبەپپەن كەتكەنىن مەن بىلمەيمىن. بىراق ولاردى ەشكىم قۋدالاعان جوق، كەرىسىنشە جۇمىسقا شاقىرىلدى. ءبارى اشىق تۇردە جۇمىس ىستەپ جاتىر.
– سەرىكقالي مۇقاشەۆتىڭ جازۋىنشا، ەرتىسباەۆ «مەنى قاسىم-جومارت توقاەۆ تاعايىندادى» دەپ ايتاتىن كورىنەدى. بۇل ءسوز قانشالىقتى قيسىندى؟
– توراعانى دەموكراتيالىق تسەنتراليزمگە ساي سەزدىڭ جۇمىس بارىسىندا دەلەگاتتار سايلادى.
– سەرىكقالي مۇقاشەۆتىڭ جازباسىنان كەيىن پارتيادا قاندايدا ءبىر وزگەرىس بولا ما؟ ناقتىراق ايتساق ەرتىسباەۆ توراعالىقتان كەتە مە؟
– ەگەر مۇنداي ماسەلە كوتەرىلەتىن بولسا، دەموكراتيالىق تسەنتراليزمگە بايلانىستى بۇل سۇراق قاراستىرىلادى. بۇل ءبىر ادامنىڭ ايتقانىنا بايلانىستى ەمەس، ۇجىمدىق دەڭگەيدە شەشىلەدى. ياعني، كوپشىلىك داۋىسپەن شەشىم قابىلداناتىن بولادى. بىراق قازىرگى تاڭدا پارتيامىزدىڭ ساياسي كەڭەس مۇشەلەرى مەن بيۋرو مۇشەلەرى مۇنداي ماسەلە كوتەرىپ وتىرعان جوق.
– ەرتىسباەۆ پارتيانى قالاي باسقارىپ وتىر دەپ ويلايسىز؟
– مەنىڭ ويىمشا، ەرتىسباەۆتىڭ ارقاسىندا پارتيا حالىق اراسىندا تانىلىپ كەلە جاتىر. مىسالى بىزگە كوپتەگەن قانداستار قوسىلىپ جاتىر. ودان بودەك پروفسويۋز، شاحتەرلار قوسىلدى. بۇل كىسىنىڭ تاجىريبەسىنە ساي ءبىزدى حالىقتىڭ ىشىنەن شىققان اۋقىمدى الەۋمەتتىك توپتار قولداپ جاتىر. بۇل ونىڭ جۇمىسىنىڭ كورسەتكىشتەرىنىڭ ءبىرى دەپ ەسەپتەيمىن. مەن ءوز باسىم ەرتىسباەۆتىڭ زيانىن كورىپ جاتقان جوقپىن.
سەرىك جولداسباي
"ادىرنا" ۇلتتىق پورتالى
