قازاقستان پرەزيدەنتى نۇرسۇلتان نازارباەۆ بۇعان دەيىن جۇمىستان زاڭسىز قۋىلعانى تۋرالى مالىمدەگەن اقتاۋ قالالىق سوتىنىڭ بۇرىنعى توراعاسى مالىك كەنجاليەۆتى قىزمەتىنەن بوساتقان. بۇل تۋرالى اقپاراتتى ماڭعىستاۋ وبلىستىق سوتىنىڭ ءباسپاسوز حاتشىسى گاۋحار نۇرمانوۆا ازاتتىق تىلشىسىنە راستادى.
نازارباەۆ 20 اقپاندا قول قويعان جارلىقتا كەنجاليەۆتىڭ قىزمەتىنەن ءوز ءوتىنىشى بويىنشا بوساتىلىپ، سۋديا وكىلەتى توقتاتىلعانى جازىلعان. بۇعان قوسا جارلىقتا وسكەمەندەگى №2 قالالىق سوتتىڭ توراعاسى قازبەك قاسىموۆ، الماتىنىڭ بوستاندىق اۋداندىق سوتىنىڭ سۋدياسى گۇلميرا جولامانوۆانىڭ "تەرىس قىلىعى" ءۇشىن جۇمىستان بوساتىلعانى ايتىلعان. كەنجاليەۆ پرەزيدەنت جارلىعىنا بايلانىستى پىكىرىن بىلدىرگەن جوق.
59 جاستاعى مالىك كەنجاليەۆ وتكەن اپتادا ءبىر-بىرىنە قاراما-قايشى ەكى مالىمدەمەسىمەن نازارعا ءىلىندى. 11 اقپاندا سوت ءجيۋريىنىڭ شەشىمىمەن اقتاۋ قالالىق سوتىنىڭ توراعاسى كەنجاليەۆتىڭ سۋديا وكىلەتى توقتاتىلعان. كەنجاليەۆ بۇعان ەلدە تىيىم سالىنعان "قازاقستاننىڭ دەموكراتيالىق تاڭداۋى" قوزعالىسىنىڭ Telegram چاتىنداعى جازبالارى ءۇشىن ءىستى بولعان ايگۇل اقبەرديەۆانى "سوتتاۋ تۋرالى باسشىلىق بۇيرىعىن ورىنداماعانى" سەبەپ بولعانىن مالىمدەپ، حالىقارالىق قۇقىق قورعاۋ ۇيىمدارىنان كومەك سۇرادى. ايگۇل اقبەرديەۆانى اقتاعان سوت ۇكىمىنە قارسىلىق بىلدىرگەن ماڭعىستاۋ وبلىستىق پروكۋراتۋراسى ءىستى قايتا قاراۋدى سۇراپ، 20 اقپاندا وبلىستىق سوتتىڭ اپەللياتسيالىق القاسىنا ءوتىنىش بەرگەن.
14 اقپاندا قازاقستان جوعارعى سوتىنىڭ توراعاسى جاقىپ اسانوۆ كەنجاليەۆتىڭ ءسوزىن جوققا شىعارىپ، ول "سۋديا ادەبىنە قايشى كەلەتىن تەرىس قىلىعى ءۇشىن" جۇمىستان ۋاقىتشا شەتتەتىلدى دەپ ايتتى. سول كۇنى كەشكە مالىك كەنجاليەۆ وزىنە ەشقانداي قىسىم جاسالماعانى جانە حالىقارالىق قولداۋعا مۇقتاج ەمەس ەكەنى تۋرالى مالىمدەمەسى جازىلعان ۆيدەونى Facebook الەۋمەتتىك جەلىسىندەگى پاراعىندا جاريالادى.
كەنجاليەۆ اقتاۋ قالالىق سوتىنىڭ توراعاسى قىزمەتىنە 2016 جىلى قاراشادا تاعايىندالعان ەدى. ول 2005-2010 جىلدارى اقتاۋ قالالىق مامانداندىرىلعان اكىمشىلىك سوتىنىڭ سۋدياسى، 2010-2012 جىلدارى جاڭاوزەن قالالىق مامانداندىرىلعان اكىمشىلىك سوتىنىڭ توراعاسى، كەيىن تۇپقاراعان اۋداندىق سوتىنىڭ توراعاسى قىزمەتتەرىن اتقارعان.
"ازاتتىق" راديوسى
