Qazaqstan prezidentı Nūrsūltan Nazarbaev būǧan deiın jūmystan zaŋsyz quylǧany turaly mälımdegen Aqtau qalalyq sotynyŋ būrynǧy töraǧasy Mälık Kenjalievtı qyzmetınen bosatqan. Būl turaly aqparatty Maŋǧystau oblystyq sotynyŋ baspasöz hatşysy Gauhar Nūrmanova Azattyq tılşısıne rastady.
Nazarbaev 20 aqpanda qol qoiǧan jarlyqta Kenjalievtıŋ qyzmetınen öz ötınışı boiynşa bosatylyp, sudia ökıletı toqtatylǧany jazylǧan. Būǧan qosa jarlyqta Öskemendegı №2 qalalyq sottyŋ töraǧasy Qazbek Qasymov, Almatynyŋ Bostandyq audandyq sotynyŋ sudiasy Gülmira Jolamanovanyŋ "terıs qylyǧy" üşın jūmystan bosatylǧany aitylǧan. Kenjaliev prezident jarlyǧyna bailanysty pıkırın bıldırgen joq.
59 jastaǧy Mälık Kenjaliev ötken aptada bır-bırıne qarama-qaişy ekı mälımdemesımen nazarǧa ılındı. 11 aqpanda sot jiuriınıŋ şeşımımen Aqtau qalalyq sotynyŋ töraǧasy Kenjalievtıŋ sudia ökıletı toqtatylǧan. Kenjaliev būǧan elde tyiym salynǧan "Qazaqstannyŋ demokratiialyq taŋdauy" qozǧalysynyŋ Telegram chatyndaǧy jazbalary üşın ıstı bolǧan Aigül Aqberdievany "sottau turaly basşylyq būiryǧyn oryndamaǧany" sebep bolǧanyn mälımdep, halyqaralyq qūqyq qorǧau ūiymdarynan kömek sūrady. Aigül Aqberdievany aqtaǧan sot ükımıne qarsylyq bıldırgen Maŋǧystau oblystyq prokuraturasy ıstı qaita qaraudy sūrap, 20 aqpanda oblystyq sottyŋ apelliasiialyq alqasyna ötınış bergen.
14 aqpanda Qazaqstan Joǧarǧy sotynyŋ töraǧasy Jaqyp Asanov Kenjalievtıŋ sözın joqqa şyǧaryp, ol "sudia ädebıne qaişy keletın terıs qylyǧy üşın" jūmystan uaqytşa şettetıldı dep aitty. Sol künı keşke Mälık Kenjaliev özıne eşqandai qysym jasalmaǧany jäne halyqaralyq qoldauǧa mūqtaj emes ekenı turaly mälımdemesı jazylǧan videony Facebook äleumettık jelısındegı paraǧynda jariialady.
Kenjaliev Aqtau qalalyq sotynyŋ töraǧasy qyzmetıne 2016 jyly qaraşada taǧaiyndalǧan edı. Ol 2005-2010 jyldary Aqtau qalalyq mamandandyrylǧan äkımşılık sotynyŋ sudiasy, 2010-2012 jyldary Jaŋaözen qalalyq mamandandyrylǧan äkımşılık sotynyŋ töraǧasy, keiın Tüpqaraǧan audandyq sotynyŋ töraǧasy qyzmetterın atqarǧan.
"Azattyq" radiosy
