اسكەردە ءوز-وزىنە قول سالۋ دەرەكتەرىنىڭ ارتقانىن سەناتتاعى باس اسكەري پروكۋروردىڭ ءبىرىنشى ورىنباسارى ماقسات قازيەۆ جوققا شىعاردى. ونىڭ ايتۋىنشا، ءوز-وزىنە قول سالۋ فاكتىلەرى اسكەردە ءجيى بولادى دەگەن قوعامدىق پىكىر - نەگىزسىز، دەپ حابارلايدى "ادىرنا" ۇلتتىق پورتالى.
ماقسات قازيەۆ ءوز بايانداماسىندا 2020 جىلدان باستاپ 270 اسكەري قىزمەتكەر كوز جۇمعانىن حابارلادى. 2020 جىلى 78, 2021 جىلى 96 ادام، 2022 جىلى 85 ادام جانە 2023 جىلدىڭ باسىنان باستاپ 11 اسكەري قىزمەتكەردىڭ جان ءتاسىلىم ەتكەنى ايتىلدى.
پروكۋرور پايىزدىق دەرەكتەردى العا تارتىپ، اسكەردەگى ءولىمدى "اقتاپ الۋعا" تىرىستى. ونىڭ ايتۋىنشا، اسكەريلەردىڭ 36%-ى اۋرۋدان، 24%-ى اپات سالدارىنان جانە 20%-ى سۋيتسيد كەسىرىنەن كوز جۇمادى.
ء"وزىن-ءوزى ءولتىرۋ جاعدايلارى بارشانى الاڭداتادى. ءتۇرلى مالىمەتتەر بويىنشا، حالىق اراسىنداعى سۋيتسيد دەڭگەيى بويىنشا قازاقستان الەمنىڭ 20 ەلىنىڭ قاتارىنا، ال جاسوسپىرىمدەر اراسىندا العاشقى ۇشتىككە كىرەدى. قۇقىقتىق ستاتيستيكا كوميتەتىنىڭ 2018-2022 جىلدارداعى نەعۇرلىم ناقتى رەسمي دەرەكتەرى بويىنشا، ەلدە 17 631 سۋيتسيد فاكتىسى تىركەلدى. ال 21 332 ادام وزىنە قول سالۋعا ارەكەت جاساعان. ونىڭ ىشىندە 86 سۋيتسيد جانە 20 وزىنە قول سالۋ ارەكەتى اسكەردە بولدى. دەمەك، وزىنە قول سالۋ اسكەردە ءجيى بولادى دەگەن قوعامدىق پىكىر رەسمي مالىمەتتەرمەن راستالمايدى", – دەدى قازيەۆ.
سونىمەن قاتار، قازيەۆ ساربازداردىڭ زاڭسىز ارەكەت نەگىزىندە ءوز ءومىرىن ءوزى ۇزەتىندىگىن ايتادى. سوڭعى ءۇش جىلدا قىلمىستىق ارەكەتتىڭ سالدارىنان اسكەردە توعىز ادام مەرت بولعان.
"ادىرنا" ۇلتتىق پورتالى
