Áskerde óz-ózine qol salý derekteriniń artqanyn senattaǵy Bas áskerı prokýrordyń birinshi orynbasary Maqsat Qazıev joqqa shyǵardy. Onyń aıtýynsha, óz-ózine qol salý faktileri áskerde jıi bolady degen qoǵamdyq pikir - negizsiz, dep habarlaıdy "Adyrna" ulttyq portaly.
Maqsat Qazıev óz baıandamasynda 2020 jyldan bastap 270 áskerı qyzmetker kóz jumǵanyn habarlady. 2020 jyly 78, 2021 jyly 96 adam, 2022 jyly 85 adam jáne 2023 jyldyń basynan bastap 11 áskerı qyzmetkerdiń jan tásilim etkeni aıtyldy.
Prokýror paıyzdyq derekterdi alǵa tartyp, áskerdegi ólimdi "aqtap alýǵa" tyrysty. Onyń aıtýynsha, áskerılerdiń 36%-y aýrýdan, 24%-y apat saldarynan jáne 20%-y sýııd kesirinen kóz jumady.
"Ózin-ózi óltirý jaǵdaılary barshany alańdatady. Túrli málimetter boıynsha, halyq arasyndaǵy sýııd deńgeıi boıynsha Qazaqstan álemniń 20 eliniń qataryna, al jasóspirimder arasynda alǵashqy úshtikke kiredi. Quqyqtyq statıstıka komıtetiniń 2018-2022 jyldardaǵy neǵurlym naqty resmı derekteri boıynsha, elde 17 631 sýııd faktisi tirkeldi. Al 21 332 adam ózine qol salýǵa áreket jasaǵan. Onyń ishinde 86 sýııd jáne 20 ózine qol salý áreketi áskerde boldy. Demek, ózine qol salý áskerde jıi bolady degen qoǵamdyq pikir resmı málimettermen rastalmaıdy", – dedi Qazıev.
Sonymen qatar, Qazıev sarbazdardyń zańsyz áreket negizinde óz ómirin ózi úzetindigin aıtady. Sońǵy úsh jylda qylmystyq árekettiń saldarynan áskerde toǵyz adam mert bolǵan.
"Adyrna" ulttyq portaly
