23-25 اقپان ارالىعىندا جاڭاوزەندە "قوعامدىق ءتارتىپتى بۇزدى" دەپ ايىپتالعان 16 ادام جاۋاپقا تارتىلىپ، 5-7 كۇنگە قاماۋعا الىنعان. بۇل تۋرالى ماڭعىستاۋ وبلىستىق پروكۋراتۋراسىنا سىلتەمە جاساعان ازاتتىق راديوسى حابارلايدى.
پروكۋراتۋرانىڭ مالىمدەۋىنشە، قامالعاندارعا "قوعامدىق ورىنداردى لاستادى، بىلاپىت سويلەدى" دەگەن ايىپ تاعىلعان.
پروكۋراتۋرا جاڭاوزەن قالاسى اكىمدىگىنىڭ جانىندا "الەۋمەتتىك، ۇلتتىق، رۋلىق، ناسىلدىك، تەكتىك-توپتىق الاۋىزدىقتى قوزدىرۋعا باعىتتالعان سوزدەر ايتقان" تۇرعىننىڭ ۇستىنەن قىلمىستىق ءىس قوزعالىپ، تەرگەۋ باستالعانىن حابارلادى.
وعان قىلمىستىق كودەكستىڭ "الەۋمەتتىك، ۇلتتىق، رۋلىق، ناسىلدىك، تەكتىك-توپتىق الاۋىزدىق قوزدىرۋ" بابى بويىنشا ايىپ تاعىلعان. بۇل باپ بويىنشا، 2 جىلدان 7 جىلعا دەيىن باس بوستاندىعىن شەكتەۋ نەمەسە باس بوستاندىعىنان ايىرۋ جازاسى قاراستىرىلعان.
ماڭعىستاۋ وبلىستىق پروكۋراتۋراسى ءتارتىپ بۇزعاندار ءتيىستى زاڭنامامەن جاۋاپقا تارتىلاتىنىن ەسكەرتتى.
سوڭعى اپتادا جاڭاوزەن قالاسىندا ونداعان ادام نارازىلىق ءبىلدىرىپ، بيلىكتەن جالاقىسى جاقسى جۇمىس تاۋىپ بەرۋدى تالاپ ەتكەن. ولارمەن كەزدەسۋگە ماڭعىستاۋ وبلىسى پروكۋرورىنىڭ ورىنباسارى ەرجان تۇرماعامبەتوۆ كەلگەن. 27 اقپاندا جاڭاوزەنگە حابار تاراتۋعا بارعان ازاتتىق تىلشىلەرى ءسانيا تويكەن مەن سانات نۇربەكوۆتى پوليتسيا ۇستاعان.
