Jaŋaözende jūmys sūraǧandar qamauǧa alyndy

23-25 aqpan aralyǧynda Jaŋaözende "qoǧamdyq tärtıptı būzdy" dep aiyptalǧan 16 adam jauapqa tartylyp, 5-7 künge qamauǧa alynǧan. Būl turaly Maŋǧystau oblystyq prokuraturasyna sılteme jasaǧan Azattyq radiosy habarlaidy. Prokuraturanyŋ mälımdeuınşe, qamalǧandarǧa "qoǧamdyq oryndardy lastady, bylapyt söiledı" degen aiyp taǧylǧan. Prokuratura Jaŋaözen qalasy äkımdıgınıŋ janynda "äleumettık, ūlttyq, rulyq, näsıldık, tektık-toptyq alauyzdyqty qozdyruǧa baǧyttalǧan sözder aitqan" tūrǧynnyŋ üstınen qylmystyq ıs qozǧalyp, tergeu bastalǧanyn habarlady. Oǧan Qylmystyq kodekstıŋ "Äleumettık, ūlttyq, rulyq, näsıldık, tektık-toptyq alauyzdyq qozdyru" baby boiynşa aiyp taǧylǧan. Būl bap boiynşa, 2 jyldan 7 jylǧa deiın bas bostandyǧyn şekteu nemese bas bostandyǧynan aiyru jazasy qarastyrylǧan. Maŋǧystau oblystyq prokuraturasy tärtıp būzǧandar tiıstı zaŋnamamen jauapqa tartylatynyn eskerttı. Soŋǧy aptada Jaŋaözen qalasynda ondaǧan adam narazylyq bıldırıp, bilıkten jalaqysy jaqsy jūmys tauyp berudı talap etken. Olarmen kezdesuge Maŋǧystau oblysy prokurorynyŋ orynbasary Erjan Tūrmaǧambetov kelgen.  27 aqpanda Jaŋaözenge habar taratuǧa barǧan Azattyq tılşılerı Säniia Toiken men Sanat Nūrbekovtı polisiia ūstaǧan.