«ارسەلورميتتالتەمىرتاۋ» زاڭگەرىنىڭ ولىمىنە قاتىستى كۇدىكتىلەر ۇستالدى

جۇرگىزىلگەن جەدەل-تەرگەۋ ءىس-شارالارىنىڭ ناتيجەسىندە شاحتينسك قالاسىنىڭ 52 جانە 44 جاستاعى تۇرعىندارى انىقتالدى. بۇل تۋرالى “ادىرنا” ۇلتتىق پورتالى حابارلايدى. قىلمىستىق وقيعا جابىرلەنۋشىنىڭ كاسىبي قىزمەتىمەن بايلانىستى ەمەس. ايعاقزاتتار تاركىلەندى. قازىرگى ۋاقىتتا ءتيىستى ساراپتامالار تاعايىندالعان. بۇدان الدىن شاحتينسك قالاسىنداعى كوپقاباتتى ۇيلەردىڭ بىرىندە بولعان ءورتتى ءسوندىرۋ كەزىندە تجد قىزمەتكەرلەرى 54 جاستاعى ايەلدىڭ دەنەسىن تاپقان بولاتىن. ول «ارسەلورميتتال تەمىرتاۋ» كومپانياسىنىڭ زاڭگەرى بولىپ شىقتى. ايەلدىڭ دەنەسىندە پىشاق جاراقاتى بولعان. قايعىلى وقيعا 23 ساۋىردە شامامەن تۇسكى ۋاقىتتا بولعان. بەس قاباتتى تۇرعىن ءۇيدىڭ 5-قاباتىنداعى پاتەردە جالپى اۋدانى 6 شارشى مەتر اۋماقتا جيھاز بەن ءۇي زاتتارى ورتەنگەن.  پوليتسيا «كىسى ءولتىرۋ» بابى بويىنشا ءىس قوزعاعان.