«ZHEIF-2023» حالىقارالىق ەكونوميكالىق جانە ينۆەستيتسيالىق فورۋمى اياسىندا جامبىل وبلىسى جامبىل اۋدانىندا «Almaly resort» ەتنو-تۋريستىك دەمالىس ايماعى اشىلدى.
«فورتيس كونستراكشن» جشس گرودەكوۆا اۋىلدىق وكرۋگى اۋماعىنىن اشىلعان دەمالىس ورتالىعىنا بۇگىنگە دەيىن 700 ملن تەڭگە ينۆەستيتسيا سالعان. نىسانعا 10 شاقىرىم ەلەكتر جەلىسى جۇرگىزىلىپ، جوبادا كوزدەلگەن عيماراتتار مەن قۇرىلىستار بوي كوتەردى.
قۇرىلىس جۇمىستارىنا 60-80 ازامات جۇمىلدىرىلعان. جەر اۋماعى 9.6 گەكتاردى قۇرايدى.
ورتالىقتىڭ اشىلۋ سالتاناتىنا قر مادەنيەت جانە سپورت مينيسترلىگى تۋريزم يندۋسترياسى كوميتەتىنىڭ توراعاسى داستان رىسبەكوۆ، وبلىستىق ءماسليحات توراعاسى ابدالى نۇراليەۆ، اۋدان اكىمى ەرلان قىدىرالىۇلى جانە ينۆەستورلار مەن بيزنەس وكىلدەرى قاتىستى.
«فورتيس كونستراكشن» جشس باسشىسى دوسان رىمتاەۆ قوناقتارعا ەۋروپالىق ۇلگىدە سالىنعان ورتالىقتىڭ مۇمكىنشىلىگىن جان-جاقتى تانىستىرىپ ءوتتى.
– وبلىس تۇرعىندارى مۇندا تاۋلى ايماقتىڭ تابيعاتىن تاماشالاي الادى. جوبا تولىعىمەن اياقتالعاندا، ورتالىق ءبىر مەزەتتە 250 ادامدى قابىلداۋعا قاۋقارلى بولادى. دەمالىس ورتالىعىندا تەك قانا جازدا عانا ەمەس، جىل ون ەكى اي دەمالۋعا جاعداي جاسالۋدا. قىس مەزگىلىندە تاۋ بوكتەرىنەن شانامەن سىرعاناۋعا ارنالعان جوبانى ىسكە قوسامىز. بارلىق عيماراتتار اۋىز سۋ، جىلۋمەن قامتاماسىز ەتىلگەن. سونداي-اق، اتپەن ساياحات، كۆادروتسيكلمەن سەرۋەن ۇيىمداستىرىلماق. بۇدان بولەك، 10 كيىز ءۇي تىگىلۋدە. جەرگىلىكتى تۇرعىندار ءۇشىن باعانىڭ قولجەتىمدىلىگىنە نازار اۋداراتىن بولامىز، – دەيدى د. رىمتاەۆ.
سونىمەن قاتار، مۇندا 70 ادامعا ارنالعان 7 كوتەدج، 8 قوناق ءۇي، ەۋروپالىق مونشالار، 150 ادامدى تاماقپەن قامتاماسىز ەتۋگە ارنالعان كافە-مەيرامحانا، تەحنيكالىق جانە سەرۆيمستىك نىسان، ۇلكەن جانە ورتاشا باسسەينن، فۋتبول، تەنيس الاڭدارى، 120 ادامعا ارنالعان اشىق دەمالىس ورنى، ات سپورتى الاڭشاسى، بالىق وسىرۋگە ارنالعان توعان سالىنعان.
قۇرىلىس جۇمىستارىن نەبارى 10 ايدا جۇرگىزگەن سەرىكتەستىكتىڭ باسشىسى الداعى ۋاقىتتا دا ورتالىقتى تۇرلەندىرە تۇسۋگە، بىرقاتار قۇرىلىستى اياقتاۋعا 300 ملن تەڭگەدەي قاراجات جۇمسالاتىنىن ايتىپ ءوتتى.
قوناقتار ورتالىقتاعى جۇمىستاردى جاقسى باعالادى.
