كوميسسيا 1059 ءوتىنىشتى قاراپ ۇلگەرسە، 94 الماتىلىق ءوز ءىسىن دامىتۋعا گرانتتى ماقۇلداعان.
الماتىدا بيزنەس-يدەيالاردى جۇزەگە اسىرۋ ءۇشىن قالا تۇرعىندارىنا جالپى سوماسى 517,5 ملن تەڭگەگە 375 گرانت بەرۋ جوسپارى بەكىتىلدى. بۇل تۋرالى وڭىرلىك كوممۋنيكاتسيالار قىزمەتىنىڭ الاڭىندا الماتى قالالىق جۇمىسپەن قامتۋ ورتالىعىنىڭ ديرەكتورى ساعىندىق كەنجەباەۆ ايتتى، دەپ حابارلايدى "ادىرنا" پورتالى.
قازىرگە دەيىن كوميسسيا 1059 ءوتىنىشتى قاراپ ۇلگەردى، ونىڭ ىشىندە 94 الماتىلىق ءوز ءىسىن دامىتۋعا گرانتتى ماقۇلداسا، قالعان 965-ىنەن باس تارتىلدى.
«400 ەسەلەنگەن ايلىق ەسەپتىك كورسەتكىش (1 380 000 تەڭگە) كولەمىندەگى مەملەكەتتىك گرانت – بۇل جاڭا كاسىپ اشۋ جانە دامىتۋ ءۇشىن قايتارىمسىز نەگىزدە بەرىلەتىن باستاپقى كاپيتال»، - دەدى ساعىندىق كەنجەباەۆ.
الماتى قالالىق جۇمىسپەن قامتۋ ورتالىعىنىڭ ديرەكتورى گرانتتى تەك قاجەتتى قۇرال-جابدىقتار، قۇرال-سايماندار، تەحنولوگيالىق جابدىقتار، مال، مۇلىك، قۇس، كوشەت، بۇتا، تۇقىم ساتىپ الۋعا جانە ءۇي-جايدى جالعا الۋ اقىسىن تولەۋگە عانا بەرۋگە بولاتىنىن ءتۇسىندىردى.
گرانتتار تۇتىنۋشىلىق ماقساتتارعا، نەسيەلىك قارىزداردى وتەۋگە، جىلجىمايتىن تۇرعىن ءۇيدى ساتىپ الۋعا جانە يپوتەكاعا سالۋعا، جەر تەلىمدەرىن ساتىپ الۋعا جانە اكتسيزدەلەتىن ءونىم وندىرۋگە بەرىلمەيدى. سونىمەن قاتار، مەملەكەت بيزنەستى جۇزەگە اسىرۋ ءۇشىن باستاپقى كاپيتالدى تەك حالىقتىڭ الەۋمەتتىك وسال توپتارىنداعى ازاماتتارعا عانا بولەدى.
گرانتتاردى كەلەسى ساناتتارعا جاتاتىن تىركەلگەن جۇمىسسىزدار جانە ءۇش جىلدان از جۇمىس ىستەگەن ءوزىن-ءوزى جۇمىسپەن قامتىعاندار الا الادى:
- كوپ بالالى ادامدار - كوپ بالالى بولعانى ءۇشىن جاردەماقى الۋشىلار (كۇيەۋى، جۇبايى);
- ميگرانتتار جانە ولاردىڭ ەڭبەككە قابىلەتتى وتباسى مۇشەلەرى;
- مۇگەدەك بالانى (كۇيەۋىن، جۇبايىن) تاربيەلەۋ بويىنشا جاردەماقى الاتىن تۇلعالار;
- از قامتىلعان ادامدار – اتاۋلى الەۋمەتتىك كومەك الۋشىلار جانە ولاردىڭ وتباسى مۇشەلەرى;
- اسىراۋشىسىنان ايىرىلعان جاعدايدا تولەنەتىن الەۋمەتتىك تولەمدەردى الۋشىلار;
- قانداس مارتەبەسى بار تۇلعالار;
- مۇگەدەكتەر.
سونىمەن قاتار، گرانت يەگەرلەرىنىڭ «Bastau Business» جوباسى بويىنشا كاسىپكەرلىك نەگىزدەرىنە وقۋدان وتكەنى تۋرالى سەرتيفيكاتى بولۋى كەرەك (وقىتۋدى ونلاين، skills.enbek.kz پورتالىندا اياقتاۋعا بولادى). سونداي-اق، مارتەبەسىن تەكسەرۋ كەزىندە الەۋەتتى گرانت يەگەرلەرى ەرىكتى قونىس اۋدارۋعا (وڭتۇستىكتەن سولتۇستىككە) قاتىسۋشىلاردى قوسپاعاندا، جۇمىسپەن قامتۋعا جاردەمدەسۋدىڭ بەلسەندى شارالارىنىڭ قاتىسۋشىسى بولۋى ءتيىس. گرانت العان ساتتەن باستاپ ونىڭ يەلەرى جەكە كاسىپكەردى ءۇش اي ىشىندە تىركەۋى كەرەك.
گرانتقا قاتىسۋ ءۇشىن business.enbek.kz پورتالىندا تىركەلۋ قاجەت. باسقا سۇراقتار بويىنشا الماتىلىقتار دوستىق داڭعىلى 85, «الەۋمەتتىك قىزمەت كورسەتۋ ءۇيى» مەكەنجايى بويىنشا جۇمىسپەن قامتۋ ورتالىعىنا نەمەسە 310-47-82 بىرىڭعاي نومىرىنە حابارلاسا الادى.
"ادىرنا" ۇلتتىق پورتالى
