ەلوردادا وتان قورعاۋشىلار كۇنى مەن ۇلى جەڭىس كۇنى قارساڭىندا «AMANAT» پارتياسىنىڭ «جاستار رۋحى» جاستار قاناتى ۇيىمداستىرعان ءداستۇرلى «Qaisar» اسكەري-پاتريوتتىق ويىندارىنىڭ اشىلۋ سالتاناتى ءوتتى.
اقتىق كەزەڭنىڭ باستالعانىن ايشىقتايتىن سالتاناتتى ءىس-شاراعا پارتيا حاتشىسى داۋلەت كارىبەك، قر قورعانىس ءمينيسترىنىڭ وكىلدەرى، پارلامەنت دەپۋتاتتارى جانە قارۋلى كۇشتەردىڭ ارداگەرلەرى، تانىمال سپورت جۇلدىزدارى قاتىستى.
«جۇرەگىندە وتانشىلدىق رۋحى جالىنداعان جاستاردىڭ جاڭا بۋىنى ءوسىپ كەلە جاتقانىنا ءبارىمىز كۋامىز. تاۋەلسىزدىگىمىزدى نىعايتىپ، ەلىمىزدى ودان ارى وركەندەتۋ قازىرگى ۇرپاقتىڭ قاسيەتتى بورىشى. داستۇرگە اينالىپ كەلە جاتقان «Qaisar» اسكەري-پاتريوتتىق ويىندارى – وتانشىل جاستاردى ادال قىزمەت ەتۋگە، ەل قورعانى بولۋعا تاربيەلەيتىن بىرەگەي الاڭ. بىلتىر ىرىكتەۋ كەزەڭىنە 1700-گە جۋىق جاس ازامات قاتىسقان بولسا، بيىل قاتىسۋشىلار سانى 3000-نان استى»، – دەدى داۋلەت كارىبەك.
سونداي-اق، پارتيا حاتشىسى اقتىق كەزەڭنىڭ الدىندا جاستاردىڭ جىگەرىن جانىپ، ولاردىڭ بار كۇش-جىگەرىن سالاتىنىنا سەنىم ءبىلدىردى. «AMANAT»-تىڭ ساياسي تۇعىرناماسىندا ەلىمىزدى، جەرىمىزدى قاسىق قانىمىز قالعانشا كوزدىڭ قاراشىعىنداي قورعاۋىمىز كەرەك ەكەنى انىق جازىلعانىن اتاپ ءوتتى.
«جاستار – ەگەمەن ەلىمىزدىڭ بولاشاعى. سوندىقتان بۇگىنگى ءىس-شارا ءبارىمىز ءۇشىن ماڭىزدى. ارقايسىڭىز تاربيەلى، ءبىلىمدى، مادەنيەتتى، نامىستى ازامات بولىپ ءوسىپ كەلە جاتقاندارىڭىزعا سەنىمدىمىن. سىزدەرگە تەك ساتتىلىك جانە جارقىن جەڭىس تىلەيمىن. وسى ورايدا، «AMANAT» پارتياسىنا جانە بۇل ءىس-شارانىڭ وتۋىنە اتسالىسقان ازاماتتاردىڭ بارىنە العىسىمدى بىلدىرەمىن. ەلىمىز امان، جۇرتىمىز تىنىش بولعاي»، – دەدى قر پارلامەنتى ءماجىلىسىنىڭ دەپۋتاتى داۋلەت تۇرلىحانوۆ.
ەسكە سالا كەتەيىك، پارتيانىڭ جاستار قاناتى اتالعان جوبانى ىسكە قوساتىنىن بىلتىر «AMANAT»-تىڭ كەزەكتەن تىس XXII سەزىندە مالىمدەگەن بولاتىن. بيىل ەكىنشى مارتە ۇيىمداستىرىلىپ وتىرعان ءىس-شارانىڭ ايماقتارداعى ىرىكتەۋ كەزەڭى 15-25 ءساۋىر ارالىعىندا ءوتتى.
«ەلىمىزدىڭ تۇكپىر-تۇكپىرىنەن جۇزدەن جۇيرىك، مىڭنان تۇلپار جاستار جينالدى. سىزدەر ءوز وڭىرلەرىڭىزدە قاتاردان قارا ءۇزىپ، بۇگىنگى اقتىق كەزەڭگە جولداما الىپ كەلدىڭىزدەر. ال ەندى ەلوردا تورىندە جەڭىسكە جەتۋ ءۇشىن وسىعان دەيىن جيعان ءبىلىم-بىلىكتەرىڭىزدى، دارا داعدىلارىڭىزدى، توزىمدەرىڭىزدى تانىتاسىزدار دەگەن ويدامىن. ءتىپتى، ارالارىڭىزدا بولاشاق وتان قورعاۋشىلار، سەرجانتتار مەن وفيتسەرلەر تۇرعانىنا سەنىمدىمىن»، – دەدى قر قورعانىس ءمينيسترىنىڭ ورىنباسارى سۇلتان قامالەتدينوۆ.
ءىس-شارا بارىسىندا دەسانتتىق-شابۋىلداۋ اسكەرلەرى سوعىستاعى ۇرىس بارىسىن بەينەلەيتىن كورىنىس قويدى. ال الەمگە تانىمال اتلەت سەرگەي تسىرۋلنيكوۆ جاستاردىڭ الدىندا ءوز كۇشىن كورسەتىپ، جينالعان كوپشىلىكتى ءتانتى ەتتى.
«مەن ءۇشىن ءبارىڭ جەڭىمپازسىڭدار. ەل قورعاۋ – قاسيەتتى بورىش. وزدەرىڭدەي ورەندەر ەلىمىزگە قاشان دا قاجەت. ءبىز اقىلدى، سابىرلى، ساناسى سەرگەك، ويى ۇشقىر جاستارعا قاراپ سۇيسىنەمىز. ءاردايىم قايسار، وجەت، العىر بولىڭدار. اتا-بابادان امانات بولىپ قالعان اتامەكەنىمىزدى قورعاي بىلىڭدەر. ابىرويلارىڭ اسپانداي بەرسىن»، – دەدى قارۋلى كۇشتەر ارداگەرى، كونتر-ادميرال راتمير كومراتوۆ.
اقتىق كەزەڭگە جولداما العان جاستار ەكى كۇن بويى ەلوردادا ءتۇرلى سىناقتان ءوتىپ، ءوزارا باق سىناسادى. ياعني، ولار قاشىقتىققا جۇگىرىپ، ارنايى اسكەري جاتتىقتىرۋشىلار دايىنداعان كەدەرگىلەرمەن ءجۇرىپ وتەدى.
سونداي-اق، ساپتىق دايىندىق دەڭگەيلەرىن تانىتىپ، «مەنىڭ ەلىم – قازاقستان» اتتى اسكەري-تانىمدىق ۆيكتورينادا ءبىلىمىن شىڭدايدى.
