Elordada Otan qorǵaýshylar kúni men Uly jeńis kúni qarsańynda «AMANAT» partııasynyń «Jastar Rýhy» jastar qanaty uıymdastyrǵan dástúrli «Qaisar» áskerı-patrıottyq oıyndarynyń ashylý saltanaty ótti.
Aqtyq kezeńniń bastalǵanyn aıshyqtaıtyn saltanatty is-sharaǵa partııa Hatshysy Dáýlet Káribek, QR Qorǵanys mınıstriniń ókilderi, Parlament depýtattary jáne qarýly kúshterdiń ardagerleri, tanymal sport juldyzdary qatysty.
«Júreginde otanshyldyq rýhy jalyndaǵan jastardyń jańa býyny ósip kele jatqanyna bárimiz kýámiz. Táýelsizdigimizdi nyǵaıtyp, elimizdi odan ary órkendetý qazirgi urpaqtyń qasıetti boryshy. Dástúrge aınalyp kele jatqan «Qaisar» áskerı-patrıottyq oıyndary – otanshyl jastardy adal qyzmet etýge, el qorǵany bolýǵa tárbıeleıtin biregeı alań. Byltyr irikteý kezeńine 1700-ge jýyq jas azamat qatysqan bolsa, bıyl qatysýshylar sany 3000-nan asty», – dedi Dáýlet Káribek.
Sondaı-aq, partııa Hatshysy aqtyq kezeńniń aldynda jastardyń jigerin janyp, olardyń bar kúsh-jigerin salatynyna senim bildirdi. «AMANAT»-tyń Saıası tuǵyrnamasynda elimizdi, jerimizdi qasyq qanymyz qalǵansha kózdiń qarashyǵyndaı qorǵaýymyz kerek ekeni anyq jazylǵanyn atap ótti.
«Jastar – egemen elimizdiń bolashaǵy. Sondyqtan búgingi is-shara bárimiz úshin mańyzdy. Árqaısyńyz tárbıeli, bilimdi, mádenıetti, namysty azamat bolyp ósip kele jatqandaryńyzǵa senimdimin. Sizderge tek sáttilik jáne jarqyn jeńis tileımin. Osy oraıda, «AMANAT» partııasyna jáne bul is-sharanyń ótýine atsalysqan azamattardyń bárine alǵysymdy bildiremin. Elimiz aman, jurtymyz tynysh bolǵaı», – dedi QR Parlamenti Májilisiniń depýtaty Dáýlet Turlyhanov.
Eske sala keteıik, partııanyń jastar qanaty atalǵan jobany iske qosatynyn byltyr «AMANAT»-tyń kezekten tys XXII sezinde málimdegen bolatyn. Bıyl ekinshi márte uıymdastyrylyp otyrǵan is-sharanyń aımaqtardaǵy irikteý kezeńi 15-25 sáýir aralyǵynda ótti.
«Elimizdiń túkpir-túkpirinen júzden júırik, myńnan tulpar jastar jınaldy. Sizder óz óńirlerińizde qatardan qara úzip, búgingi aqtyq kezeńge joldama alyp keldińizder. Al endi elorda tórinde jeńiske jetý úshin osyǵan deıin jıǵan bilim-bilikterińizdi, dara daǵdylaryńyzdy, tózimderińizdi tanytasyzdar degen oıdamyn. Tipti, aralaryńyzda bolashaq Otan qorǵaýshylar, serjanttar men ofıerler turǵanyna senimdimin», – dedi QR Qorǵanys mınıstriniń orynbasary Sultan Qamaletdınov.
Is-shara barysynda desanttyq-shabýyldaý áskerleri soǵystaǵy urys barysyn beıneleıtin kórinis qoıdy. Al álemge tanymal atlet Sergeı yrýlnıkov jastardyń aldynda óz kúshin kórsetip, jınalǵan kópshilikti tánti etti.
«Men úshin báriń jeńimpazsyńdar. El qorǵaý – qasıetti borysh. Ózderińdeı órender elimizge qashan da qajet. Biz aqyldy, sabyrly, sanasy sergek, oıy ushqyr jastarǵa qarap súısinemiz. Árdaıym qaısar, ójet, alǵyr bolyńdar. Ata-babadan amanat bolyp qalǵan atamekenimizdi qorǵaı bilińder. Abyroılaryń aspandaı bersin», – dedi Qarýly kúshter ardageri, kontr-admıral Ratmır Komratov.
Aqtyq kezeńge joldama alǵan jastar eki kún boıy elordada túrli synaqtan ótip, ózara baq synasady. Iaǵnı, olar qashyqtyqqa júgirip, arnaıy áskerı jattyqtyrýshylar daıyndaǵan kedergilermen júrip ótedi.
Sondaı-aq, saptyq daıyndyq deńgeılerin tanytyp, «Meniń elim – Qazaqstan» atty áskerı-tanymdyq vıktorınada bilimin shyńdaıdy.
