ەلوردادا «AMANAT» پارتياسىنىڭ «جاستار رۋحى» جاستار قاناتى ۇيىمداستىرعان «Qaisar» اسكەري-پاتريوتتىق ويىندارى ءوز مارەسىنە جەتتى.
ىرىكتەۋ كەزەڭىندە ەلىمىزدەگى 3000-نان استام جاس ازاماتتىڭ اراسىنان سۋىرىلىپ شىعىپ، اقتىق سايىسقا جولداما العان 120 قاتىسۋشى ەكى كۇن بويى تارتىستى دودادا باق سىنادى. ولار قاشىقتىققا جۇگىرىپ، ارنايى اسكەري جاتتىقتىرۋشىلار دايىنداعان كەدەرگىلەرمەن ءجۇرىپ ءوتتى. سونىمەن قاتار، ساپتىق دايىندىق دەڭگەيلەرىن كورسەتىپ، «مەنىڭ ەلىم – قازاقستان» اتتى اسكەري-تانىمدىق ۆيكتورينادا ءبىلىمىن شىڭدادى.
سايىس قورىتىندىسى بويىنشا، تۇركىستان وبلىسىنىڭ كومانداسى جۇلدەلى ءبىرىنشى ورىندى يەلەنسە، ەكىنشى ورىندى قاراعاندى وبلىسىنىڭ وقۋشىلارى قانجىعاسىنا بايلادى. ال ءۇشىنشى ورىنعا الماتى قالاسىنىڭ كومانداسى لايىق دەپ تانىلدى. جەڭىمپازدارعا باعالى سىي-سياپاتتار تابىستالدى.
جەڭىمپازداردى ماراپاتتاۋ راسىمىندە پارتيا حاتشىسى داۋلەت كارىبەك «Qaisar»-دىڭ باستى ماقساتى جاستاردىڭ بويىندا پاتريوتتىق رۋحتى وياتىپ، ولاردىڭ اسكەري قىزمەتكە دەگەن قىزىعۋشىلىعىن ارتتىرۋ ەكەنىن اتاپ ءوتتى.
«سىزدەرمەن «Qaisar» اسكەري-پاتريوتتىق ويىندارىنىڭ اقتىق كەزەڭىندە جۇزدەسكەنىمە وتە قۋانىشتىمىن. ۇلان-عايىر جەرىمىزدى اتا-بابامىز بىزگە امانات ەتىپ قالدىردى. ونى قورعاۋ، كەلەر ۇرپاققا قاز-قالپىندا ۇسىنۋ – ءبارىمىزدىڭ قاسيەتتى بورىشىمىز. ەل دە، جەر دە بىزدىكى. وسى بايلىعىمىزدى سىرتتان بىرەۋ كەلىپ قورعاپ بەرمەيدى. وتانىمىزدى وسى تۇرعان سىزدەر مەن بىزدەر قورعايمىز. حالقىمىزدا «جەر ەلگە امانات، ەل ەرگە امانات» دەگەن ۇلاعاتتى ءسوز بار. اماناتقا ادال بولايىق. ارقاشان ءبىلىمدى، نامىستى، جۇرەكتى بولىڭدار»، – دەدى داۋلەت كارىبەك.
تۇركىستان وبلىسىنان كەلگەن كوماندانىڭ مۇشەسى ستاس گراچەۆ جەڭىس وڭايلىقپەن كەلمەگەنىن، الايدا وسى ۋاقىت ارالىعىندا بالالار جاڭا دوس تاپقانىن ايتتى.
«كوڭىل-كۇيىمىز كوتەرىڭكى، جۇرەگىمىز تولقىپ تۇر. سايىس اسا قىزىقتى ءوتتى. ءبىز ءبىرىنشى ورىندى يەلەندىك. بۇل جەڭىستى ءبىز ءوز وبلىسىمىزعا ارنايمىز. سەبەبى ءبىز مۇندا ءوڭىرىمىزدىڭ نامىسىن قورعاۋعا كەلدىك»، – دەدى ول.
ەسكە سالا كەتەيىك، پارتيانىڭ جاستار قاناتى اتالعان جوبانى ىسكە قوساتىنىن بىلتىر «AMANAT»-تىڭ كەزەكتەن تىس XXII سەزىندە مالىمدەگەن بولاتىن.
