استانادا 2 جاسار بالا 3 قاباتتان قۇلاپ كەتتى. بۇل تۋرالى توتەنشە جاعدايلار قىزمەتى ايتتى، دەپ حابارلايدى «ادىرنا» ءتىلشىسى.
باسقارمانىڭ مالىمدەۋىنشە، وقىس وقيعا 6 مامىر كۇنى بايتۇرسىنوۆ كوشەسى، 37 ۇيدە بولعان.
"2021 جىلى تۋعان قىز بالا ۇلكەن ادامداردىڭ قاراۋىنسىز قالىپ، 7 قاباتتى تۇرعىن ءۇيدىڭ 3 قاباتىنان قۇلاپ كەتكەن. اناسى ۇلكەن بالاسىمەن ءتىس دارىگەرىندە بولعان كەزدە ۇيدە وتىرعان اكەسى بالانىڭ تەرەزەنى اشىپ، سىرتقا قالاي شىعىپ كەتكەنىن بايقاماي قالعان. قۋانىشقا وراي كورشىلەرى سىرتتا قۇلايىن دەپ تۇرعان بالانى كورىپ قالعان. ولار كورپە جايىپ تۇرىپ، ءبۇلدىرشىندى قاعىپ الدى. قىز بالا اۋرۋحاناعا جاتقىزىلدى. جاعدايى ورتاشا دارەجەدە", - دەلىنگەن توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىندە.
