ابىلاي مىرزاحمەتوۆ ەكى ايعا قاماۋعا الىندى. بۇل تۋرالى قالالىق سوتتىڭ ءباسپاسوز قىزمەتى جاريالادى، دەپ حابارلايدى “ادىرنا” ۇلتتىق پورتالى.
10 مامر كۇنى «اتامەكەن» ۇلتتىق كاسىپكەرلەر پالاتاسىنىڭ بۇرىنعى باسشىسى ابىلاي مىرزاحمەتوۆ قاماۋعا الىنعانىن حابارلاعان بولاتىنبىز.
كەيىن انتيكوررۋپتسيالىق قىزمەت ول قانداي قىلمىسقا قاتىستى ۇستالعانىن جاريا ەتتى.
كەيبىر اقپارات قۇرالدارىنىڭ حابارلاۋىنشا، ول «30 ميلليون دوللار پارامەن» ۇستالعان. بۇل اقپارات رەسمي تۇردە راستالعان جوق.
ابىلاي مىرزاحمەتوۆ وتكەن جىلدىڭ اقپان ايىندا «اتامەكەن» ۇكپ باسقارما توراعاسى قىزمەتىنەن كەتتى.
بۇعان دەيىن ول قازاقستان رەسپۋبليكاسى پرەزيدەنتى جانىنداعى ەكونوميكالىق ءوسىمدى قالپىنا كەلتىرۋ جونىندەگى مەملەكەتتىك كوميسسيانىڭ مۇشەسى بولعان.
سونداي-اق «قازاقستان تەمىر جولى» رەسپۋبليكالىق مەملەكەتتىك كاسىپورنى باس ديرەكتورىنىڭ مىندەتىن اتقارۋشى، «سامۇرىق-قازىنا» قورى جانىنداعى قوعامدىق كونسۋلتاتيۆتىك كەڭەستىڭ جاۋاپتى حاتشىسى بولدى.
