بىرنەشە كۇننەن بەرى تۇركياعا بارىپ بيزنەس باستاعىسى كەلگەن قازاق قىزدارىنىڭ قازىرگى جان-ايقايى جەلىنى شۋلاتقان ەدى. بەلگىلى بلوگەر ۇلدانا ەرقاسىمقىزى مەن كاسىپكەر دينارا قوسجان وزدەرىنىڭ وفلاين وقۋلارىنا ءار ادامنان 700 مىڭ تەڭگە الىپ تۇركياعا شاقىرعان. قوعام بەلسەندىسى، زاڭگەر ايگۇل ورىنبەككە كومەك سۇراپ شىققان قىز-كەلىنشەكتەردىڭ ءىسى ءالى دە قارالىپ جاتىر. دينارا قوسجان ءوز ۇستىنەن شاعىم ايتقانداردى "قورقىتىپ جاتىر" دەگەن سىبىس تاراۋدا. بۇل تۋرالى زاڭگەر ايگۇل ورىنبەك ءوز پاراقشاسىندا جازدى، دەپ حابارلايدى "ادىرنا" ۇلتتىق پورتالى.
دينارا قوسجان ءوز ۇستىنە ارىز جازىپ شاعىمدانعانداردى "5-6 اي ستامبۋلدا قاماتامىن" دەپ قورقىتقان.
“ايگۇل اپا ءبىزدى 5-6 اي ستامبۋلدا قاماتىپ قالدىرامىن، مىقتى ادۆوكات جالداپتى ءبىز قورقىپ جاتىرمىز” دەپ جازىپ جاتقان ستامبۋلدا جۇرگەن قىزدار!
ادام ولتىرگەن قىلمىسكەر دە ءوزىن قورعاپ قالۋ ءۇشىن ادۆوكات جالدايدى.بۇكىل الەمنىڭ ادۆوكاتىن جالداپ قورعانسا دا، ەگەر سىزدەر كوپ بولىپ، شىندىق سەندەر جاقتا بولسا، جازانى ادۆوكات ەمەس سوت شىعارادى!حالىقتى الداماعان، ارتى تازا ادام ءار ءتۇرلى ۆيدەو سالىپ اقتالىپ، قورقىتىپ، ۇركىتپەي بىردەن سوتقا بارادى.ءوز ءىس ارەكەتتەرىندە زاڭسىزدىقتارى بار ادام عانا وسىلاي قوقان لوقىعا كوشەدى!",- دەدى جازباسىندا ايگۇل ورىنبەك.
ەگەر كىناسىز بولسا، بىلاي اقتالماس ەدى، قوقاڭ لوقىعا جول بەرمەس ەدى دەگەن زاڭگەر بۇل ءىستىڭ ارتىندا ءبىر شيكىلىك تۇرعانىن جاسىرمادى.
"سول سەبەپتى قىزدار سىزدەر وزدەرىڭە سەنىمدى بولىپ، ارىزدانۋشىلار قاتارى كوبەيگەن سايىن، ول ادامنىڭ قىلمىستىق جاۋاپكەرشىلىگى ۇلعايا تۇسەدى!بۇكىل قوقان لوقى، شانتاج جاساعان اۋديو جازبالارىن ساقتاپ قويىڭىزدار! جاساعان قىلمىسىنىڭ ۇستىنە قىلمىس قوسىلىپ جاتىر.
ادۆوكات جالداعان ادام قوقان لوقىدان بۇرىن الداعى ۋاقىتتا وسىنداي زاڭسىزدىقتار جاساماۋ كەرەك ەكەنىن ءبىلۋ كەرەك!
ادۆوكات جالداۋ سۋرەتىن سالىپ قويىپ ەلدەردى قورقىتىپ ۇركىتۋ ەمەس، ادۆوكاتتىڭ پايدالى كەڭەستەرىن تىڭداۋ بولىپ تابىلادى!
بىراق سليشكوم اقىلدى ميلليونەرلەر، ادۆوكاتتى دا تىڭداماۋى مۇمكىن!",- دەدى.
تۇركياعا ميلليونەر بولامىز دەپ كەتكەن قىزداردىڭ ءبىرازى وسىنداي شاعىممەن ەلگە حابارلاسقان. باستارىنا قاۋىپ-قاتەر ءتونىپ تۇرعاندارىن ايتىپ الەك. ءتىپتى، تۇراقتايتىن جەرى بولماي، اەروپورتتا تۇنەگەندەرى دە بار.
"ادىرنا" ۇلتتىق پورتالى
