31 مامىردا وتكەن پارلامەنت وتىرىسىندا ءماجىلىس دەپۋتاتى ەرمۇرات باپي باس پروكۋرور بەرىك اسىلوۆقا ساۋال جولدادى، دەپ حابارلايدى “ادىرنا” ۇلتتىق پورتالى.
دەپۋتات جولداعان ساۋالىندا حالىق قازىناسىن ۇرلاعاندارعا قاتىستى تىڭ مالىمەتتەرىن ايتىپ، ادىلەتتىلىك ورناتۋ ماقساتىندا ەل پرەزيدەنتى جاريالاعان ناۋقاندى اشىق جۇرگىزۋدى سۇرادى.
حالىق قازىناسىنان ۇرلانىپ-جىرلانعان اكتيۆتەردى ەلگە قايتارۋعا قاتىستى زارىقتىرعان زاڭ جوباسى اقىر سوڭى ماجىلىسكە ءتۇستى. ازىرگە كوز جۇگىرتىپ شىققاندا، ونىڭ شيكى تۇستارى از ەمەس. بىراق ءبىز – ەگەر شىنايى حالىقتىڭ دەپۋتاتتارى بولساق، بۇل زاڭدى ەلدە ادىلەت ورناتۋدىڭ ءبىر ينسترۋمەنتاريى دەڭگەيىنە جەتكىزىپ قابىلداۋىمىز كەرەك بولادى. بۇل ءپرينتسيپتى جانە كۇن تارتىبىندە تۇرعان ەڭ ماڭىزدى ماسەلە. ءبىز كلەپتوكرات ۇرىلار 30 جىل بويى تالان-تاراجعا سالعان حالىق بايلىعىن، تىم قۇرىعاندا، ونىڭ تەڭ جارتىسىن ەلگە قايتارۋىمىز كەرەك. بۇل كەمىندە 150 ميلليارد دوللارمەن ولشەنەتىن قازىنا، - دەپ اتاپ ءوتتى ەرمۇرات باپي.
سونداي-اق، باس پروكۋروردى «ءتيىستى زاڭنىڭ قابىلداۋىن كۇتپەي، ىسكە شۇعىل كىرىسۋگە» شاقىرعان ءماجىلىس دەپۋتاتى، الداعى بەس جىلدا كلەپتوكراتيا تاقىرىبىن «پارلامەنت پارتاسىنان» قايتالاي بەرەتىنىن دە جاسىرعان جوق.
ەسكە سالايىق، مامىردىڭ 23-دە ماجىلىس قاراۋىنا «زاڭسىز الىنعان اكتيۆتەردى مەملەكەتكە قايتارۋعا قاتىستى» بەس زاڭ جوباسى كەلىپ ءتۇستى. بۇل ماسەلەگە قاتىستى ەل ىشىندە ءتيىستى زاڭدار ازىرلەپ، قابىلداۋ جونىندە مەملەكەت باسشىسى 2022 جىلى تاپسىرما بەرگەن بولاتىن.
