«قازاقستان ينجينيرينگ» ۇك» اق جاڭعىرتىلعان «شاعالا-م» ۇشقىشسىز ۇشاتىن اپپاراتىن سىناقتان ءساتتى وتكىزدى، دەپ حابارلايدى "ادىرنا" پورتالى قر يندۋستريا مينيسترلىگىنىڭ ءباسپاسوز قىزمەتىنە سىلتەمە جاساپ.
جاڭارتۋ كەزىندە قۇرىلعىنىڭ تاكتيكالىق جانە تەحنيكالىق سيپاتتامالارى جاقساردى، اتاپ ايتقاندا: ونىڭ جىلدامدىعى، بيىكتىگى جانە ۇشۋ قاشىقتىعى.
«قازاقستان ينجينيرينگ» اق باسقارما توراعاسى تەمىرجان ءابدىراحمانوۆ ۇشقىشسىز ۇشۋ اپپاراتىنىڭ كەڭىنەن قولدانىلاتىنىن، ونى ىزدەستىرۋ-قۇتقارۋ جۇمىستارىندا تىكۇشاقپەن ەمەس، مۇناي قۇبىرلارىن، گاز قۇبىرلارىن جانە ەلەكتر جەلىلەرىن باقىلاۋ ءۇشىن جانە توتەنشە جاعداي كەزىندەگى بايلانىس جانە باقىلاۋ ءۇشىن قاداعالاۋشى رەتىندە پايدالانۋعا بولاتىنىن اتاپ ءوتتى.
«ارتىقشىلىعى شاعالا-M-گە ۇشۋ-قونۋ جولاعى قاجەت ەمەس. قۇنى شەتەلدىك انالوگتارعا قاراعاندا ارزانىراق. ءونىمدى وتكىزۋ ءۇشىن سەرتيفيكاتتار – ست-KZ, ونەركاسىپتىك سەرتيفيكات جانە سايكەس پاتەنت الىندى»، - دەدى «R&D Center Kazakhstan Engineering» جشس باس ديرەكتورى عاني بايسەيىتوۆ.
2023 جىلى قر يندۋستريا مينيسترلىگى قازاقستان رەسپۋبليكاسىنىڭ اۋە كەڭىستىگىندە ۇشقىشسىز ۇشاتىن اپپاراتتاردى پايدالانۋ قاعيدالارىن ازىرلەدى. ول اۋە كەڭىستىگىن پايدالانۋ ءتارتىبىن عانا ەمەس، سونىمەن قاتار ۇشقىشسىز ۇشۋ اپپاراتتارىن ەسەپكە الۋدى، ساناتتاۋدى جانە ولارعا رۇقسات بەرۋدى دە رەتتەۋگە ءتيىس.
ءوز كەزەگىندە «قازاقستان ينجينيرينگ» اۆياتسيالىق وقۋ ورتالىعىنىڭ بازاسىندا ازاماتتىق دروندار مەن كوپتەرلەردىڭ قاۋىپسىز جانە ءتيىمدى جۇمىس ىستەۋىن قامتاماسىز ەتۋ ءۇشىن ۇشقىشتار مەن مەحانيكتەردى دايارلاۋ باعدارلاماسىن ىسكە قوسادى.
"ادىرنا" ۇلتتىق پورتالى
