ۇلىتاۋ ءوڭىرىنىڭ قاراعاندى وبلىسىنان ەنشى الىپ، جەكە دارا وبلىس بولىپ قۇرىلعانىنا 1 جىل تولىپ وتىر.
سارىارقانىڭ ورتالىعى، قازاق حالقىنىڭ ۇلت بولىپ ۇيىسۋى جولىندا دەربەس مەملەكەت رەتىندە قالىپتاسۋى مەن كەمەلدەنۋى جولىندا ايرىقشا ءمان-ماڭىزعا يە ۇلىتاۋدىڭ تاريحى تىم تەرەڭ جانە قادىر-قاسيەتى زور.
جاڭا وبلىس ءوزىنىڭ قۇرىلعانىنا ءبىر جىل تولۋ تويىن ءداستۇرلى «ۇلىتاۋ ءۇنى» فەستيۆالى اياسىندا اتاپ وتۋدە. «ۇلىتاۋ ءۇنى» فەستيۆالى – تالاي ءدۇلدىلدىڭ باعىن اشىپ، جۇلدىزىن جاققان ونەر بايگەسى رەتىندە كوپكە تانىمال. بۇگىن ءحححى-ءشى رەت جالاۋىن كوتەرگەن ونەر دۋمانى سالتاناتتى تۇردە اشىلدى.
فەستيۆال باعدارلاماسى اياسىندا اتى اڭىزعا اينالعان بارد ءانشى، قازاقستاننىڭ ەڭبەك سىڭىرگەن قايراتكەرى قوراباي ەسەنوۆتىڭ ءان كەشىن، اقىن باعدات بايجانتاەۆتىڭ جىر كەشىن وتكىزۋ جوسپارلانعان.
سونداي-اق، اقان سەرىنىڭ 180 جىلدىعىنا ارنالعان رەسپۋبليكالىق ءداستۇرلى ءان ورىنداۋشىلار بايقاۋى، قۇرمانعازىنىڭ 205 جىلدىعىنا ارنالعان كۇيشىلەر بايقاۋى، حالىق باتىرى امانگەلدى يمانوۆتىڭ تۋعانىنا 180 جىل تولۋىنا ارنالعان رەسپۋبليكالىق اقىندار ايتىسى وتپەك. شىنبولات دىلدەباەۆ اتىنداعى تەرمەشىلەر بايقاۋى دا فەستيۆال باعدارلاماسىنىڭ باستى شاراسى.
فەستيۆال بىلتىردان بەرى رەسپۋبليكالىق دەڭگەيدە ۇيىمداستىرىلىپ كەلەدى. ونەر مەرەكەسىنە قازاقستاننىڭ بارلىق تۇپكىر-تۇپكىرىنەن 150-دەن استام ونەرپاز بەن قوناق جينالعان. ايتا كەتەيىك، فەستيۆال 7-9 ماۋسىم ارالىعىندا وتەدى.
ايدا راحىمقۇلوۆا،
"ادىرنا" ۇلتتىق پورتالى
