ۇلىتاۋ وبلىسىنىڭ كەڭگىر اۋىلىندا «Kengir agro» كەشەنىنىڭ قۇرىلىسى باستالدى. اتالعان ورىندا سۋارمالى ەگىنشىلىك، مال بورداقىلاۋ الاڭى، ءسۇت فەرماسى سىندى ءىرى جوبالار جۇزەگە اسادى. باستاما – «وتباسىلىق فەرما» جوباسىنىڭ اياسىندا قولعا الىنعان. ماقسات – وڭىردە ىشكى ءونىم قورىن مولايتىپ، ەكونوميكانى ءارتاراپتاندىرۋ جانە جاڭا جۇمىس ورىندارىن اشۋ.
قازىرگى تاڭدا كەشەن اۋماعىندا اكىمشىلىك-شارۋاشىلىق عيمارات، جۇمىسكەرلەرگە ارنالعان جاتاقحانا، اسحانا، مال بورداقىلاۋ الاڭى، قورا-جايلار مەن قويما سالىنۋدا. جالپى 901 گەكتار اۋماقتىڭ 500 گەكتارى مال ازىعىن دايىنداۋ ءۇشىن پايدالانىلادى. ول ءۇشىن تامشىلاتىپ سۋارۋ ءادىسى قولدانىلادى. قازىرگى ۋاقىتتا قاجەتتى قۇرىلعىلار جەتكىزىلدى. 45 مىڭ كۋب سۋ كولەمىنە ارنالعان قازانشۇڭقىر قازىلۋدا.
ايتا كەتەرلىگى، قۇرىلىس بارىسىندا وبلىس اۋماعىندا وندىرىلەتىن ماتەريالدار قولدانىلىپ جاتىر.
«بۇل – سوڭعى وتىز جىلدىقتا ءبىزدىڭ وڭىردە بولماعان جوبا. تامشىلاتىپ سۋارۋ ادسىمەن اتالعان اۋماققا مال ازىعى، جەم-ءشوپ وسىرىلەدى. قاجەتتى قوردى دايىنداعان سوڭ 500-گە جۋىق اسىل تۇقىمدى ءىرى قارا سيىر اكەلىپ، بورداقىلانادى. ناتيجەسىندە الداعى ەكى جىلدا ءوزىمىزدىڭ ءسۇت ونىمدەرىن دايىندايتىن فەرما پايدا بولماق»-دەدى اۋىل شارۋاشىلىعى جانە جەر قاتىناستارى باسقارماسىنىڭ باسشىسى المات ساۋحيموۆ.
«وتباسىلىق فەرما» - ەش وبلىستا بالاماسى جوق جوبا. قازىرگى ۋاقىتتا ونىڭ اياسىندا جاڭاارقا اۋدانىنىڭ تۇگىسكەن، العاباس، اينابۇلاق، ورىنباي اۋىلدارىندا دا فەرمالاردىڭ جۇمىسىن جۇرگىزۋ قارقىن الدى.
