ۇلىتاۋ وبلىسىنىڭ اكىمى ەسەت بايكەن باستاعان وبلىس اكىمدىگىنىڭ دەلەگاتسياسى «قازاقمىس» توبىنىڭ وڭىردەگى نەگىزگى وندىرىستىك، سالىنىپ جاتقان جانە الەۋمەتتىك نىساندارىن ارالادى.
ءوڭىر باسشىسىمەن «قازاقمىس كورپوراتسياسى» جشس باسقارما توراعاسى رۋسلان وسكەنالى جانە كومپانيانىڭ بەيىندى باعىتتارىنىڭ باسشىلارى بىرگە ءجۇردى.
ساپار باعدارلاماسىنداعى العاشقى وندىرىستىك نىسان باتىس جەزقازعان كەنىشىنىڭ №67 شاحتاسى بولدى. مۇندا وبلىس اكىمىنە كەن ءوندىرۋدىڭ تەحنولوگيالىق ۇدەرىسى، زاماناۋي جەراستى تەحنيكاسىنىڭ جۇمىسى جانە ونەركاسىپتىك قاۋىپسىزدىكتىڭ قولدانىستاعى ستاندارتتارى تانىستىرىلدى.
بۇدان كەيىن دەلەگاتسيا «قازاقمىس بارلاۋ» جشس-نىڭ بۇرعىلاۋ الاڭىنا باردى. مۇندا باسقارما توراعاسىنىڭ ورىنباسارى – گەولوگيالىق بارلاۋ جونىندەگى باس وپەراتسيالىق ديرەكتور عالىم نۇرجانوۆ زاماناۋي بۇرعىلاۋ قوندىرعىلارىنىڭ جۇمىسىمەن تانىستىرىپ، كومپانيانىڭ گەولوگيالىق بارلاۋ باعدارلاماسىنىڭ ىسكە اسىرىلۋ بارىسى تۋرالى باياندادى. بۇگىندە ۇلىتاۋ وبلىسىندا ءوڭىردىڭ مينەرالدىق-شيكىزات قورىن تولىقتىرۋعا باعىتتالعان اۋقىمدى گەولوگيالىق بارلاۋ باعدارلاماسى جۇزەگە اسىرىلۋدا. باعدارلاما اياسىندا 50 مىڭ قۋما مەتردەن استام اۋماققا بۇرعىلاۋ جۇمىسىن جۇرگىزۋ جوسپارلانعان.
ساپار بارىسىندا وبلىس اكىمى ساتباەۆ قالالىق اۋرۋحاناسى جانىنان سالىنىپ جاتقان جاڭا تراۆماتولوگيالىق پۋنكتتىڭ قۇرىلىسىمەن تانىستى. جاڭا نىسان قالا تۇرعىندارى مەن كاسىپورىن جۇمىسكەرلەرى ءۇشىن شۇعىل مەديتسينالىق كومەكتىڭ قولجەتىمدىلىگى مەن ساپاسىن ارتتىرۋعا مۇمكىندىك بەرەدى. نىساندى پايدالانۋعا بەرۋ 2027 جىلعا جوسپارلانعان.
وسىدان سوڭ دەلەگاتسيا ساتباەۆ قالاسىنداعى كەنشى داڭقى الاڭىنا بارىپ، جۇرگىزىلىپ جاتقان جوندەۋ جانە اباتتاندىرۋ جۇمىسىمەن تانىستى. جاڭارتىلعان الاڭ كەنشىلەر ەڭبەگىنە كورسەتىلگەن قۇرمەتتىڭ بەلگىسى رەتىندە قالا تۇرعىندارىنىڭ باسىن قوساتىن زاماناۋي قوعامدىق كەڭىستىككە جانە ءتۇرلى مادەني-كوپشىلىك ءىس-شارا وتەتىن ورىنعا اينالماق.
ساپار باعدارلاماسى بويىنشا تاعى ءبىر نىسان سالىنىپ جاتقان گەولوگيالىق كلاستەر بولدى. «قازاقمىس» وكىلدەرى «ۇلىتاۋ ۋنيۆەرسيتەتى» كەاق ۆيتسە-رەكتورى دارمەن تاشاتوۆپەن بىرگە تاۋ-كەن سالاسىنا جوعارى بىلىكتى مامان دايارلاۋعا باعىتتالعان زاماناۋي عىلىمي-ءبىلىم بەرۋ بازاسىنىڭ جوباسىن تانىستىردى.
بۇدان كەيىن وبلىس اكىمى NAMYS سپورت كەشەنىندە بولىپ، نىساننىڭ قىزمەتىمەن جانە بالالار مەن جاسوسپىرىمدەر سپورت اكادەمياسىن اشۋ جوسپارىمەن تانىستى. قۇنى 8,1 ملرد. تەڭگەنى قۇرايتىن جوبا اياسىندا اۋدانى 5 مىڭ شارشى مەتردەن اساتىن، 150-200 تاربيەلەنۋشىگە ارنالعان زاماناۋي كەشەن سالۋ كوزدەلگەن. اكادەميانىڭ اشىلۋى 2026 جىلدىڭ قىركۇيەك ايىنا جوسپارلانعان.
وسىدان سوڭ ءوڭىر باسشىسى «جاستار» ساياباعىن قايتا جاڭعىرتۋ جۇمىسىمەن تانىستى. قۇنى 4,9 ملرد. تەڭگەنى قۇرايتىن جوبا اياسىندا جاياۋ سەرۋەندەۋ جانە ۆەلوسيپەد جولدارى، سۋبۇرقاق پەن زاماناۋي بالالار ويىن الاڭدارى سالىنىپ، كوگالداندىرۋ جۇمىسى جۇزەگە اسىرىلادى. قازىرگى ۋاقىتتا دەمونتاج جۇمىسى اياقتالىپ، اباتتاندىرۋدىڭ نەگىزگى كەزەڭىنە دايىندىق جۇرگىزىلۋدە. قايتا جاڭعىرتۋ جۇمىسىن 2026 جىلدىڭ قازان ايىندا اياقتاۋ كوزدەلىپ وتىر.
ساپار قورىتىندىسىندا تاراپتار ۇلىتاۋ وبلىسىندا ونەركاسىپ، گەولوگيالىق بارلاۋ، الەۋمەتتىك ينفراقۇرىلىم، دەنساۋلىق ساقتاۋ جانە ءبىلىم بەرۋ سالالارىن دامىتۋ جونىندەگى ىنتىماقتاستىقتى ودان ءارى جالعاستىرۋعا نيەتتى ەكەندەرىن راستادى.
