وبلىس اكىمى داستان رىسپەكوۆ ۇلىتاۋ اۋدانىنا قاراستى بايقوڭىر جانە قوسكول اۋىلدارىنا جۇمىس ساپارىمەن بارىپ، بىرقاتار ينفراقۇرىلىمدىق جانە الەۋمەتتىك نىسانداردىڭ جاي-كۇيىمەن تانىستى.
ساپار اياسىندا ءوڭىر باسشىسى قارساقباي–بايقوڭىر باعىتىنداعى وبلىستىق ماڭىزى بار جولدىڭ ورتاشا جوندەۋ جۇمىستارىن باقىلاپ، جول ساپاسىنىڭ جوعارى دەڭگەيدە ورىندالۋىن قامتاماسىز ەتۋدى تاپسىردى. سونىمەن قاتار، اتالعان باعىتپەن ءجيى قاتىنايتىن جۇك كولىكتەرىنىڭ جوندەۋ جۇمىستارىنا كەدەرگى كەلتىرمەۋىن قاداعالاپ، ءتيىستى شارالاردى قابىلداۋدى جۇكتەدى.
بايقوڭىر اۋىلىندا سالىنعان فەلدشەرلىك-اكۋشەرلىك پۋنكتتىڭ قۇرىلىسىمەن تانىسقان وبلىس اكىمى، الداعى ۋاقىتتا كەلەتىن مەديتسينا قىزمەتكەرلەرىن تۇرعىن ۇيمەن قامتاماسىز ەتۋ ماسەلەسىن قاراستىرۋ قاجەت ەكەنىن ايتتى.
بۇدان بولەك، ءوڭىر باسشىسى اۋىلداعى جالپى ءبىلىم بەرەتىن مەكتەپكە باردى. ءبىلىم وشاعىن قاداعالاپ، بيۋدجەت قاراجاتىن ۇنەمدى ءارى ءتيىمدى پايدالانۋ، ارتىق شىعىندارعا جول بەرمەۋ قاجەتتىگىن تاپسىردى. سونىمەن بىرگە بالاباقشا جۇمىسىمەن تانىسىپ، نىساندى ۇقىپتى ۇستاۋ جانە جوندەۋ جۇمىستارىن جۇرگىزۋ مىندەتتەلدى.
ساپار بارىسىندا وبلىس اكىمى بايقوڭىر–قوسكول باعىتىنداعى كوكتەمگى سۋ تاسقىنىنان زارداپ شەككەن اۋماققا بارىپ، قالپىنا كەلتىرۋ جۇمىستارىنىڭ ساپالى ورىندالۋىن جانە الداعى كوكتەمگى كەزەڭگە جان-جاقتى دايىندىق جۇرگىزۋدى مىندەتتەدى.
سونداي-اق وبلىس باسشىسى يۋ اۋىل تۇرعىندارىمەن جانە جەرگىلىكتى قاۋىمداستىق مۇشەلەرىمەن كەزدەسىپ، حالىقتىڭ ۇسىنىس-پىكىرلەرىن تىڭدادى. تۇرعىندار نەگىزىنەن جول جانە ەلەكتر قۋاتىنداعى اقاۋلارعا قاتىستى ماسەلەلەردى كوتەردى. ءوڭىر باسشىسى كوتەرىلگەن سۇراقتاردىڭ بارلىعى باقىلاۋعا الىناتىنىن جەتكىزدى.
سونداي-اق، قوسكول اۋىلىندا سالىنعان فەلدشەرلىك-اكۋشەرلىك پۋنكت قۇرىلىسىمەن جانە قىزمەت كورسەتىپ تۇرعان مەكتەپتىڭ جاعدايىمەن تانىسىپ، قالعان جۇمىستاردىڭ ۋاقىتىلى ءارى ساپالى اياقتالۋىن جانە ءبىلىم بەرۋ مەكەمەسىنىڭ ماتەريالدىق-تەحنيكالىق بازاسىن نىعايتۋ بويىنشا ناقتى تاپسىرمالار بەردى.
