ابايداعى ورتتە تاعى ءبىر ادامنىڭ حابار-وشارسىز كەتكەنى حابارلاندى

ابايداعى ءىرى ءورت ايماعىندا ءىز-ءتۇزسىز جوعالعاندار سانى 15-كە جەتتى، دەپ جازادى "ادىرنا" ءتىلشىسى. «ىزدەستىرۋگە كومەك سۇرايمىز. F 937 ARE. تراكتور ءنومىرى. شاقىرۋ بەلگىسى بۇعى 61. ارحيپوۆ سەرگەي نيكولاەۆيچ، 1987 ج.ت. مەن قاشتاققا (سەمەي قالاسىنىڭ ماڭى – جۋر. رەد.) «سەمەي ورمانىنىڭ» دولون بولىمشەسىنەن شىققان ءورتتى سوندىرۋگە باردىم، سوڭعى رەت 9-ى كۇنى حابارلاستىم، كۇنى بۇگىنگە دەيىن ول تۋرالى ەشتەڭە بەلگىسىز. +7 771 582 2159 نومىرىنە قوڭىراۋ شالىڭىزدارشى»، - دەپ حابارلادى جەرگىلىكتى جۇرتشىلىق oo_osa_semey_vko پاراقشاسىندا. بۇعان دەيىن ءورت ايماعىندا 14 ادام ءىز-ءتۇزسىز جوعالعانىن حابارلاعان ەدىك. ولاردىڭ بارلىعىنىڭ دەنەسى تابىلدى. ەسكە سالايىق، سوڭعى مالىمەتتەر بويىنشا، ابايداعى ورمان ءورتىنىڭ اۋماعى 60 مىڭ گەكتاردى قۇراپ، تۇرعىندار بىردەن بىرنەشە ەلدى مەكەننەن كوشىرىلدى. ورتتەن شىققان ءتۇتىن جەتىسۋ ءوڭىرىن باسىپ ۇلگەردى. وقيعالاردان سوڭ يۋري يلين توتەنشە جاعدايلار ءمينيسترى قىزمەتىنەن بوساتىلدى (توتەنشە جاعدايلار مينيسترلىگىنىڭ جاڭا باسشىسى بولىپ سىرىم ءشارىپحانوۆ تاعايىندالدى), وبلىس اكىمى اباي نۇرلان ۇرانحاەۆقا سوگىس جاريالاندى. قىلمىستىق ءىس قوزعالىپ، ونى ارنايى پروكۋرورلار تەرگەپ جاتىر. 11 ماۋسىمدا پرەزيدەنت قاسىم-جومارت توقاەۆ قايتىس بولعان 14 ادامنىڭ بارلىعىن «قۇرمەت» وردەنىمەن ماراپاتتادى. 12 ماۋسىم قازاقستاندا جالپىۇلتتىق ازا تۇتۋ كۇنى بولىپ جاريالاندى.