قوعامدا مۇمكىندىگى شەكتەۋلى ازاماتتاردى مۇسىركەي قاراۋ قالىپتى جاعدايعا اينالعان. الايدا اتالعان ساناتتاعى ازاماتتار قوعامعا ماسىل بولماي، ءوز ماسەلەسىن ءوزى شەشكەندى ءجون كورەدى. بۇل تاراز قالاسى ءماسليحاتىنىڭ دەپۋتاتى ءارى "مۇگەدەكتەردىڭ جاستار قوعامى" قوعامدىق بىرلەستىگىنىڭ ءتورايىمى ايگەرىم داۋلەتباەۆانىڭ پىكىرى.
ايگەرىم داۋلەتباەۆانىڭ ءوزى مۇمكىندىگى شەكتەۋلى ازاماتتاردىڭ ساناتىنا جاتادى. الايدا ول مۇگەدەكپىن دەپ قاراپ وتىرماي، وزىمەن تاعدىرلاس جاندارعا قول ۇشىن بەرىپ ءجۇر.
«قازىر نەگىزىنەن سايلاۋ وكرۋگىما قاتىستى ادامدار ءجيى كەلەدى. سونداي-اق تاراز قالاسىنداعى مۇمكىندىگى شەكتەۋلى ازاماتتاردىڭ ءبارى ماعان كەلىپ، ماسەلەسىن ايتىپ جاتادى. بىرەۋى زەينەتكەتاقى الۋ مەديتسينالىق تەكسەرۋدەن ءوتۋدى، ەندى بىرەۋى پاتەر ماسەلەسى بويىنشا كەلەدى. مەن كۇن سايىن 3-4 ادامدى قابىلداپ، ماسەلەسىن شەشۋگە تىرسامىن. «بالاما مۇگەدەكتىك بويىنشا جاردەماكقى تولەمەي جاتىر» دەگەن سوڭ ارنايى مەكەمەگە حابارلاسىپ، ءمان-جايدى بىلۋگە تىرسامىن. شىنىمدى ايتسام ونداعى ادامدارعا جەكسۇران بولىپ ءبىتتىم. بىرەۋىنىڭ مۇگەدەكتىك بويىنشا زەينەتاقىسى، ەكىنشىسىنىڭ جاردەماقى بويىنشا ماسەلەسى بولىپ جاتادى. تاعى ءبىر ادامدارعا ينۆاتاكسي ۋاقىتى كەلمەي، قيىندىق تۋدىرادى. وسى جانە وزگە ماسەلە بويىنشا كۇن سايىن حابارلاسىپ، كومەك سۇرايدى. مىنە، وسىنداي سان مىڭ ماسەلەنى جاۋاپتى ادامدارعا جەكە حابارلاسىپ، شەشۋگە تىرسامىن. ءار ماسەلە بويىنشا دەپۋتاتتىق ساۋال جولداي بەرۋگە تاعى بولمايدى.
قازاقتا «وڭ قولىڭ بەرگەندى سول قولىڭ كورمەسىن» دەگەن ادەمى ءسوز بار. ءبىراز شارۋا ىستەپ جاتىرمىز. ونى جۇرتقا جاريا ەتىپ ايتا بەرۋ دە دۇرىس ەمەس. مىسالى وسىدان ەكى اي بۇرىن مۇقتاج جاندارعا ەكى قولاربا سىيلادىق. مۇمكىندىگى شەكتەۋلى جانداردىڭ ماسەلەسىنەن بولەك كۇندەلىكتى ماسەلەرگە دە نازار اۋدارىپ تۇرامىن. مىسالى جول سالۋ سەكىلدى كۇندەلىكتى تۇرمىستىق دۇنيەلەرگە ءمان بەرۋگە تىرسامىن»، – دەيدى دەپۋتات.
ايگەرىم داۋلەتباەۆا كوپبالالى وتباسىلارعا بەرىلەتىن جەڭىلدىك مۇمكىندىگى شەكتەۋلى ازاماتتارعا بەرىلمەگەنىنە نارازى.
«ماسەلەن كوپبالالى انالارعا پاتەر الۋ ءۇشىن يپوتەكالىق سەرتيفيكات بەرىلەدى. ال وبلىستىق ءماسليحات مۇگەدەكتىگى بار ازاماتتارعا بەرىلەتىن جەڭىلدىكتى الىپ تاستاپتى. وسىدان كەيىن «نە ءۇشىن مەنىڭ قىزدارىم يپوتەكا ارقىلى پاتەر الا المايدى؟» دەپ ماسەلە كوتەردىم. 10-20 جىل بويى بىرەۋدىڭ پاتەرىنە اقشا تولەپ ارەندادا تۇرعانشا، يپوتەكاعا پاتەر الىپ، ءوزىنىڭ ۇيىنە اقشا تولەسىن. پاتەر الۋ ءۇشىن كەزەكتى سارىلىپ كۇتكەنشە شاماسى كەلگەن ادامدار يپوتەكاعا پاتەر السىن. ول ءۇشىن كوپبالالى وتباسىلارعا بەرىلەتىن سەرتيفيكاتتى مۇمكىندىگى شەكتەۋلى ادامدارعا دا بەرۋ كەرەك. بۇل شەشىمدى 2022 جىلى وبلىستىق ءماسليحات وزگەرتىپ، مۇگەدەكتىگى بار ادامداردى اتالعان تىزىمنەن الىپ تاستاپتى. قازىر وبلىستىق ءماسليحاتتىڭ توراعاسىنا «مۇگەدەكتىگى بار ادامداردى نەگە تىزىمنەن الىپ تاستادىڭىزدار؟ قايتادان تىزىمگە قوسىڭىزدار» دەپ حات جازدىم. پاتەر ءۇشىن بەرىلەتىن سەرتيفيكاتتى نەگە مۇگەدەكتەرگە بەرمەيدى؟ جوق، الدە، مۇمكىندىگى شەكتەۋلى ازاماتتار يپوتەكاعا پاتەر الىپ، ونى تولەي المايدى دەپ ويلاي ما؟ قازىر مەنىڭ قىزدارىم يپوتەكاعا پاتەر الىپ، ءوزى تولەگىسى كەلەدى. مىسالى ءبىر قىزىم تاراز قالاسىنداعى 15 مولتەك اۋدانىنان پاتەر الامىن دەپ وتىر»، – دەيدى ول.
ايگەرىم داۋلەتباەۆانىڭ سوزىنە قاراساق، مۇمكىندىگى شەكتەۋلى ازاماتتار ۇكىمەتكە الاقان جايماي، ءوز بەتىنشە ارەكەت ەتكىسى كەلەدى.
