ءىس بويىنشا پروكۋرور ەرلان قۇلانباەۆ مەيىرجان تورەباەۆ پەن مەيىرحان شەرنيازوۆقا تاعىلعان ايىپتى ءىشىنارا وزگەرتتى. مەملەكەتتىك ايىپتاۋشى ولاردى قىلمىستىق كودەكستىڭ 217-بابى 3-بولىگى 2-تارماعىندا كورسەتىلگەن ارەكەتتى جاسادى دەپ سانايدى.
وسىلايشا ءىس بويىنشا 12 سوتتالۋشىنى دا 5 جىلدان 15 جىلعا دەيىنگى ۋاقىتقا باس بوستاندىعىنان ايىرۋدى سۇرادى.
الماس قۇرمانعاليەۆكە 15 جىل باس بوستاندىعىنان ايىرۋ جازاسى تاعايىندالسىن;
دانيا راحيموۆاعا 15 جىل باس بوستاندىعىنان ايىرۋ جازاسى تاعايىندالسىن;
ەرجان مانسۇروۆقا 8 جىل باس بوستاندىعىنان ايىرۋ جازاسى تاعايىندالسىن;
ەرلان مانسۇروۆ 8 جىل باس بوستاندىعىنان ايىرۋ جازاسى تاعايىندالسىن;
رۋسلان بۇرقانوۆقا (Mudarabah Capital جشس ديرەكتورى) 12 جىل باس بوستاندىعىنان ايىرۋ جازاسى تاعايىندالسىن;
نۇرلان سۇلتانباەۆقا 12 جىل باس بوستاندىعىنان ايىرۋ جازاسى تاعايىندالسىن;
اندرەي چاعا 12 جىل باس بوستاندىعىنان ايىرۋ جازاسى تاعايىندالسىن;
سامات قاسەنوۆكە 12 جىل باس بوستاندىعىنان ايىرۋ جازاسى تاعايىندالسىن;
مەيىرجان تورەباەۆ 5 جىلعا بوستاندىعىنان ايىرۋ جازاسى تاعايىندالسىن;
مەيىرحان شەرنيازوۆقا 5 جىلعا بوستاندىعىنان ايىرۋ جازاسى تاعايىندالسىن، دەدى مەملەكەتتىك ايىپتاۋشى.
ءىس بويىنشا 12 سوتتالۋشى بار.
تەرگەۋ مالىمەتتەرى بويىنشا، 2019 جىلى باستاپقىدا Astex قارجىلىق پيراميداسى قۇرىلدى. ونى قۇرمانعاليەۆ ءوزىنىڭ تۋىسى مانسۇروۆتىڭ كومەگىمەن بايۋ ماقساتىندا قۇرعان.
قۇرمانعاليەۆ قىلمىس جوسپارىن قۇرىپ، وعان تۋىسى ەرجان مانسۇروۆتى تارتتى. ءارى قاراي ۇيىمداسقان قىلمىستىق توپ قۇرعان. مانسۇروۆ جەكە مۇددەسى ءۇشىن قارجى پيراميداسىن دامىتۋ بويىنشا ءوزىنىڭ تۋىسى بەرگەن تاپسىرمالاردى ورىنداعان. مانسۇروۆ 2019 جىلى ءوز اتىنا Astex جشس-نى تىركەگەن. (...) قۇرمانعاليەۆ سالىمشىلارعا ءوز سالىمىنىڭ جىلىنا ۋادە ەتىلگەن (ايىنا 20 پايىزعا دەيىن) 240 پايىزىن تولەي المايتىنىن ءبىلىپ، ۇيىمداسقان قىلمىستىق توپ قىزمەتىن جالعاستىردى جانە جاڭا سالىمشىلاردى تارتتى. سونداي-اق جاڭا سالىمشىلار سانىن ۇنەمى كوبەيتىپ وتىرۋ قاجەت ەكەنىن ءتۇسىندى، - دەدى مەملەكەتتىك ايىپتاۋشى ەرلان قۇلانباەۆ.
پروكۋرور قارجى پيراميداسىن قۇرۋشىلار تۇرعىندار اراسىندا سەنىمدىلىك ورناتۋ ماقساتىندا بۇل ىسكە تانىمال ادامداردى تارتۋ تۋرالى شەشىم قابىلداعانىن ايتتى.
2020 جىلدىڭ ناۋرىزىندا بۇل ىسكە رۋسلان بۇرقانوۆ، اندرەي چا، ءبىرجان جارمۇحامەد، سامات قاسەنوۆ، تيمۋر رۇستەموۆ، نۇرلان سۇلتانباەۆ، مەيىرحان شەرنيازوۆ پەن ازيمجان سايدباەۆتى تارتتى.
بۇل ادامدار ۇسىنىلعان ءىس-ارەكەتتىڭ زاڭسىز ەكەنىن ءتۇسىنىپ، قارجى پيراميداسىنا قاتىسۋعا كەلىسىم بەرگەن. Mudarabah Capital جشس-نى تىركەپ، جارعىلىق كاپيتالعا قاتىسۋ ۇلەستەرىن پروپورتسيونالدى تۇردە ءبولدى. بۇل كومپانيا سالىمشىلاردىڭ اقشاسىن تارتۋ قۇرالى رەتىندە پايدالانىلۋى قاجەت بولعان. Mudarabah Capital مەن Astex اراسىندا كەلىسىم جاسالعان سوڭ Mudarabah Capital كليەنت ىزدەۋگە مىندەتتى بولدى. Astex اتىنان كەلىسىم جاساپ، كەلىسىمنەن كەيىن كەڭەس بەرۋگە جانە باسقا دا زاڭدى وپەراتسيالاردى جۇزەگە اسىرۋعا مىندەتتەلدى. بۇل كەلىسىم Mudarabah Capital-دىڭ Astex-ءتىڭ قۇرىلىمدىق بولىمشەسى بولعانىن كورسەتەدى، - دەدى پروكۋرور.
ال مەملەكەتتىك ايىپتاۋشى سوتتالۋشى رۋسلان بۇرقانوۆ Mudarabah Capital جشس ديرەكتورى بولعانىن ايتادى.
ازيمجان سايدباەۆ پەن مەيىرحان شەرنيازوۆ Mudarabah Capital جشس قۇرىلتايشىسى بولعان. ولار ۇگىت-ناسيحات جۇرگىزۋ، الەۋمەتتىك جەلىدە جارناما جاساۋعا جاۋاپتى بولعان. سونداي-اق قۇرىلتايشىلار اراسىندا قاراجات بولۋگە دە قاتىستى.
2020 جىلدىڭ قىركۇيەگىندە اتالعان ادامدار قارجى پيراميداسىن تانىمال ەتۋ ماقساتىندا الەۋمەتتىك جەلىدە 1 ميلليوننان استام جازىلۋشىسى بار مەيىرجان تورەباەۆقا سىياقى بەرۋگە ۋادە بەرىپ، بىرلەسكەن قىلمىستىق ءىس-ارەكەت جاساۋ ءۇشىن جۇگىندى. تورەباەۆ ۇسىنىستىڭ زاڭسىزدىعىن ءتۇسىنىپ، پيراميدا ءساتسىز بولعان جاعدايدا قىلمىستىق جاۋاپكەرشىلىكتەن قۇتىلا الاتىنىنا سەنىمدى بولىپ، ۇيىمداسقان قىلمىستىق توپتىڭ قۇرامىنا كىرۋگە كەلىسىم بەرىپ كىرگەن. ول سالىمشىلارعا اي سايىن ۋادە ەتىلگەن پايىز تولەۋ مۇمكىن ەمەس ەكەنىن ءتۇسىنىپ، زاڭسىز قارجى پيراميداسى ەكەنىن ءبىلىپ، جۇمىستان كىرىس تاباتىنىن ويلاپ، سالىمشىلاردىڭ قاراجاتىنان ايىرىلاتىنىن ءتۇسىنىپ، ءوز جۇمىسىن باستادى، - دەدى مەملەكەتتىك ايىپتاۋشى.
مەيىرجان تورەباەۆ كومپانيا قۇرامىندا جارناما جاساۋ، ۇگىت-ناسيحات جۇمىستارىمەن اينالىسقان. سونداي-اق ول Mudarabah Capital قۇرىلتايشىسى قاتارىندا بولعان.
ال شەرنيازوۆ پەن تورەباەۆ قارجى پيراميداسىن قۇردى جانە ۇيىمداستىردى دەگەن ايىپپەن كەلىسپەدى جانە كىناسىن مويىندامادى.
