ءماجىلىس دەپۋتاتى ەرلان سايىروۆ قازاق ۇلتتىق اگرارلىق زەرتتەۋ ۋنيۆەرسيتەتىنىڭ اكتيۆتەرىن قايتارۋدى تالاپ ەتتى. ايتۋىنشا، مۇلىك مەنشىك يەلەرىنە زاڭسىز ءوتىپ كەتكەن. بۇل تۋرالى دەپۋتات باس پروكۋرور بەرىك اسىلوۆقا جولداعان دەپۋتاتتىق ساۋالىندا ايتتى، دەپ حابارلايدى “ادىرنا” ۇلتتىق پورتالى.
دەپۋتات ساۋالىندا، قازاق ۇلتتىق اگرارلىق زەرتتەۋ ۋنيۆەرسيتەتىنىڭ ءبىر توپ وقىتۋشى عالىمى ءماجىلىس دەپۋتاتتارىنا ۋنيۆەرسيتەتتەن زاڭسىز شىققان اكتيۆتەردى وقۋ ورنىنا قايتارۋ تۋرالى ءوتىنىش جاساعانىن ايتتى. سوزدەرىنشە، ۋنيۆەرسيتەتتىڭ جەكە مەنشىگى زاڭدى تۇلعالاردىڭ يەلىگىنە زاڭسىز ءوتىپ كەتكەن.2001-2022 جىلدارى مىڭ ورىندىق ستۋدەنتتىك ءۇش جاتاقحانا، بەس وقۋ-زەرتتەۋ كورپۋسى - 18,828 شارشى مەتر. اكىمشىلىك شارۋاشىلىق عيماراتتار جانە وزگە دە جىلجىمايتىن مۇلىك وبەكتىلەرى - 700 شارشى مەتر، ۋنيۆەرسيتەت عيماراتتارىنا ىرگەلەس جەر ۋچاسكەلەرى - 5 گەكتار جەر. الماتى وبلىسىنىڭ تالعار جانە ەڭبەكشىقازاق اۋدانىندا ورنالاسقان ۋنيۆەرسيتەتتىڭ وقۋ تاجىريبەلىك شارۋاشىلىق جەر ۋچاسكەلەرى - 12 گەكتار. بارلىعى قولدى بولىپ كەتكەن. قازاقتىڭ جالپاق تىلىمەن ايتساق، ۋنيۆەرسيتەت مۇلكىنىڭ تۋ-تالاقايى شىققان، - دەدى ەرلان سايروۆ.
سونداي-اق، ول ۋنيۆەرسيتەتتىڭ عيماراتتارىن يەلەنگەن زاڭدى تۇلعالار وقۋ كورپۋستارىنىڭ اۋماعىندا بىرنەشە زاڭسىز قۇرىلىس وبەكتىسىن سالعانىن ايتتى.
وسى عيماراتتاردى يەلەنگەن زاڭدى تۇلعالار وقۋ كورپۋستارىنىڭ اۋماعىندا تۇرعىن ءۇي كەشەندەرىن سالىپ، ستۋدەنتتەردىڭ، وقىتۋشىلاردىڭ مازاسىن الىپ، جاتاقحانالاردى قوناقۇي ەتىپ قايتا جابدىقتاپ، كاراوكە، باسقا دا تۇنگى ويىن-ساۋىق ورىندارىن جاساپ، جىن ويناققا اينالدىرعان. كەيبىر وقۋ كورپۋستارى بيزنەس ورتالىقتارى بولىپ شىعا كەلگەن. اتالعان فاكتىلەر جەتكىنشەك ۇرپاقتىڭ مورالدىق-رۋحاني الەمىنە ويسىراتا جاسالعان سوققى. ادىلەتتىلىك، ۇيات پرينتسيپتەرىن تاپتاۋ بولىپ تابىلادى. ۋنيۆەرسيتەت ۇجىمى اكتيۆتەردى ساتۋ نەمەسە ولاردى سەنىمگەرلىك باسقارۋعا بەرۋ 2001-2022 جىلى بولعاندىعىن ايتىپ وتىر جانە وسى كەزدە بولعان لاۋازىمدى ادامداردى زاڭ جۇزىندە جاۋاپقا تارتۋدى سۇرايدى، - دەدى ول.
دەپۋتات ءوزىنىڭ ساۋالىندا زاڭ بۇزۋشىلاردى تارتىپكە تارتۋ ءۇشىن مىناداي قادامدار جاسالۋى كەرەكتىگىن ايتتى:
- زاڭسىز قولدى بولعان اكتيۆتەردى قايتارۋ كوميسسياسى اياسىندا اتالعان عيماراتتاردىڭ مەملەكەتتىك مەنشىگىنە قايتارۋىن جەدەل قامتاماسىز ەتۋ;
- 2001-2022 جىلدارى زاڭبۇزۋشىلىققا بارعان تۇلعالاردى زاڭ الدىندا جاۋاپكەرشىلىگىن انىقتاۋ;
- قازاقستانداعى باسقا دا جوعارعى وقۋ ورىندارىنىڭ مەنشىگىن زاڭسىز بەرۋ ماسەلەسىنە جاپپاي اۋديت جۇرگىزۋ.
