جىل سايىن كوكتەم شىعا سۋ تاسقىنى بولىپ، حالىقتى اۋرە-سارساڭعا سالادى. جىلدا قايتالاتىن وسى ءۇردىستى ءبىر جولا شەشۋگە بولا ما؟
كوكتەم كەلگەن سايىن سۋ تاسقىنىنان ادام، مال شىعىنى، ماتەريالدىق شىعىندارعا جول بەرىلەدى. ماسەلەنىڭ باسى-قاسىندا توتەنشە جاعداي قىزمەتىنىڭ وكىلدەرى، اكىمدىك ادامدارى بولماسا، حالىق قالاۋلىسى دەگەن دەپۋتاتتاردى كورە المايسىڭ. بيىلعى ەرەكشەلىك – سۋ ماسەلەسىمەن اينالىسادى دەگەن جاڭا ۆەدومستۆو، سۋ رەسۋرستارى جانە يرريگاتسيا مينيسترلىگى قۇرىلعاننان بەرى سۋ تاسقىنى ءبىرىنشى رەت بولىپ وتىر. الايدا ءىس باسىندا، سۋ بوگەتتەرى مەن گيدرونىساندار قاسىندا قازىرگىدەي سىن ساعاتتا ارنايى مەكەمەنىڭ وكىلدەرىن كورمەيسىڭ. ءالى دە سول باياعى توتەنشە جاعداي قىزمەتى مەن اكىمدىك وكىلدەرى، جەرگىلىكتى تۇرعىندار جانۇشىرىپ جۇرگەنى. ارنايى مينيسترلىك قۇرىلعان سوڭ جىلدا قايتالاناتىن وسى تۇيتكىلدى ءبىرجولاتا شەشۋگە بولماس پا ەدى؟
وسى سۇراقتى «اۋىل» پارتياسىنىڭ اتىنان ءماجىلىس دەپۋتاتى بولعان اناس باققوجاەۆقا قويدىق.
– استانانىڭ ىرگەسىندەگى قوياندى اۋىلىن سۋ باسىپ، حالىق كوشەنى جاۋىپ تاستادى. استانادان مىڭ شاقىرىم جەردەگى اۋىلدى ايتپاعاندا ەلوردانىڭ ىرگەسىندە وسىنداي بولىپ جاتقانعا «اۋىل» پارتياسى قانداي رەاكتسيا كورسەتەدى؟
– ەندى «اۋىل» پارتياسىنىڭ اتىنان جاۋاپ بەرمەي-اق قوياىن. بۇعان دەيىن پرەزيدەنتىمىز «سۋ قويمالارىن دايىنداۋ كەرەك» دەپ ايتتى عوي. مەنىڭ ويىمشا، بۇل جەردە ۇكىمەتتىڭ جىبەرگەن قاتەلىگى بار. جىل سايىن، كوكتەمدە وسى ماسەلە تۋىندايدى. وسىنىڭ كوسموتۇسىرىلىمدەرىن جاساپ، قاي جەردە سۋ كوپ جينالاتىنىن انىقتاپ، سۋ قويمالارىن ۇيىمداستىرۋ كەرەك ەدى. بىراق ول جۇمىستى ءالى دە بولسا ەشكىم قولعا العان جوق.
جاقىندا سۋ كودەكسى كەلدى، وندا بىراق تەك سۋدىڭ ماسەلەسى قاراستىرىلعان. ال بۇعان دەيىن پرەزيدەنت «20 سۋ قويماسى قۇرىلۋ كەرەك» دەپ تاپسىرما بەردى. ول 20 سۋ قويماسى قالاي قۇرىلادى؟ وسى قويمانى سالاتىن كەزدە كوكتەمدە سۋ باسىپ كەتەتىن ايماق نەگە ەسكەرىلمەيدى دەگەن سۇراق تۋىندايدى. مەنىڭ ويىمشا، وسى جۇمىستاردىڭ ورىندالۋىن تالاپ ەتۋ كەرەك.
– ياعني، ءسىزدىڭ ايتۋىڭىزشا، ءار اۋىلدا سۋ قويماسى بولۋ كەرەك قوي...
– ارينە. ءار اۋىلدىڭ سۋ جينالاتىن جەرلەرى بار. زاماناۋي تەحنيكا دامىعان كەزدە، سپۋتنيكتىك تۇسىرىلىمدەر بار كەزدە، وسى ماسەلە نەگە ەسكەرىلمەيدى؟ مەن سونى ۇقپاي قويدىم. سوندىقتان دا مەن ۇكىمەتتەن وسى جۇمىستاردىڭ ورىندالۋىن تالاپ ەتەمىن. دامبا ارقىلى سۋدى جيناقتاپ، ارنايى سۋ رەتىندە پايدالانۋعا بولادى. قازىر ءبىز ءححى عاسىردا ءومىر ءسۇرىپ جاتىرمىز عوي.
– «اۋىل» پارتياسى قوياندى سەكىلدى سۋ باسقان ايماققا بارىپ، حالىقتىڭ جاعدايىن بىلە مە؟
– بارىپ ءجۇرمىز عوي. «اۋىل» پارتياسىنىڭ فيليالدارى بارلىق جەردە بار. بۇل ماسەلەلەر الەۋمەتتىك جەلىدە كوتەرىلىپ جاتىر. بىراق بۇل ماسەلەنىڭ كوتەرىلگەنىنەن نە پايدا؟ ونىڭ شەشۋ جولىن تابۋ كەرەك. ال شەشۋ جولى ۇكىمەتتىڭ قولىندا، سەبەبى اقشا سولاردىڭ قولىندا. بۇل ماسەلە جۇيەلى شەشىلۋ ءۇشىن كوكتەمدە سۋ تۇراقتى جينالاتىن جەرلەرگە قويما سالىپ، پايدالانۋىمىز كەرەك.
– ءسىزدىڭ ويىڭىزشا، بۇل ماسەلەنى سۋ قويماسى ارقىلى شەشۋگە بولادى. وعان ۇكىمەتتىڭ پارمەنى نەگە جەتپەي وتىر؟
– ارينە، بۇل ماسەلەنى سۋ قويماسى ارقىلى شەشۋگە بولادى. بىراق وعان ۇكىمەتتىڭ پارمەنى جەتپەيدى ەمەس، اقشا جەتپەيدى. سودان كەيىن بىزدە قاتە يدەيالار كوپ كەتىپ جاتادى. نەگىزى ىسكە اسىراتىن شارۋاعا بايلانىستى جاقسى يدەيا كەرەك قوي. اقشانى ءتيىمدى قۇرتىپ، ءتيىمدى شىعىنعا ءتۇسىپ، ونى تەزىرەك ورىنداۋدىڭ امالىن تابا الماي جاتىر.
شىنار اقجانقىزى
