الداعى بەس جىلدا ۋكراينانى شوۋمەن باسقارۋى مۇمكىن. پرەزيدەنت سايلاۋىنىڭ ءبىرىنشى تۋرىنان سوڭ ۆلاديمير زەلەنسكي كانديداتتار اراسىندا كوش باستاپ كەلەدى - 30,25 پايىز. ازىلكەشكە بەرىلگەن داۋىس ۋكراينانىڭ قازىرگى پرەزيدەنتى پەتر پوروشەنكودان (16,54 پايىز) ەكى ەسەگە كوپ. وسى ورايدا Tengrinews.kz ءتىلشىسى ۋكراينا پرەزيدەنتتىگىنە باستى ۇمىتكەرمەن تانىستىرادى.
تاجىريبەسىز ساياساتكەر
بولاشاق ازىلكەش-ساياساتكەر ۋكراينادا تۋعانىمەن، بالا كەزىندە وتباسىمەن بىرگە موڭعوليادا ءتورت جىل تۇرىپ، مەكتەپ تابالدىرىعىن سول ەلدە اتتاعان. اكەسى تەحنيكا عىلىمدارىنىڭ دوكتورى، پروفەسسور بولسا، اناسى ينجەنەر قىزمەتىن اتقارعان.
زەلەنسكي مەكتەپ كەزىندە-اق ساياساتقا جاقىن بولۋدى ارمانداپ، ديپلومات ماماندىعىنا وقىماق بولعان. بىراق كەيىن ويى وزگەرىپ، زاڭگەر ءبىلىمىن الىپ شىقتى. بىراق ول زاڭگەر رەتىندە ەشقاشان جۇمىس ىستەمەگەن. ساياسي تاجىريبەسى دە جوق، بىراق ازىلكەش مۇنىڭ ۇتىمدى تۇستارىن دا تاۋىپ الدى.
"مەنىڭ زاڭگەرلىك ءبىلىمىم بار، بۇل مەن ءۇشىن پليۋس. بىراق ساياسي تاجىريبەم جوق... بۇل دا ۇلكەن پليۋس", - دەپ ازىلدەيدى ول.
نەگىزى ۆلاديمير زەلەنسكيدىڭ ءومىر جولىن انىقتاپ بەرگەن - رەسەيلىك ساحنا. ول 20 جاسىندا "95-ي كۆارتال" كومانداسىمەن بىرگە رەسەيلىك كۆن-دە ويناعان. بىراق 2003 جىلى كۆن باسشىلىعى مەن كوماندا اراسىندا جانجال بولىپ، "95-ي كۆارتال" ۋكراينالىق تەلەۆيزياعا اۋىسادى. بۇگىندە بۇل كوماندا ۋكراينادا رەيتينگى ەڭ جوعارى شوۋلاردى ۇيىمداستىراتىن ستۋدياعا اينالعان.
ازىلكەشتىڭ 16 جىل بۇرىن وتاسقان ەلەنا ەسىمدى جارى بار. جۇپ الەكساندرا ەسىمدى قىز بەن كيريلل ەسىمدى ۇل تاربيەلەپ وتىر.
زەلەنسكي "ۆەچەرني كۆارتال", "بويتسوۆسكي كلۋب", "راسسمەشي كوميكا", "ليگا سمەحا" سەكىلدى جوبالارىمەن تانىلعان. 2015 جىلى زەلەنسكي باستى رولدە وينايتىن "سلۋگا نارودا" سەريالى كورسەتىلە باستادى. مۇندا ول پرەزيدەنت سايلاۋىندا جەڭىسكە جەتكەن تاريح ءپانىنىڭ مۇعالىمىن سومدايدى. زەلەنسكي - بۇل سەريالدىڭ باستى كەيىپكەرى عانا ەمەس، يدەيا اۆتورى ءارى پروديۋسەرى. 2017 جىلى الەمدەگى ەڭ ءىرى ينتەرنەت-تۆ پلاتفورما Netflix سەريالدى كورسەتۋ قۇقىعىن ساتىپ العان.
ەۋرومايدان قولداۋشىسى
زەلەنسكي ءوزىنىڭ ساياسي كوزقاراسىن ۋكرايناداعى مايدان كەزىندە اشىق كورسەتە باستادى. ميتينگكە شىققانداردى قولداپ، ولاردىڭ الدىندا ونەر كورسەتكەن ەدى. ال دونەتسك وبلىسىندا بولعان اسكەري قاقتىعىس كەزىندە زەلەنسكي ۋكراينالىق اسكەرگە قولداۋ كورسەتىپ، ولارعا ءبىر ميلليون گريۆەن بەرگەن.
ول ءوز ازىلدەرىندە ەۋرومايدان تۋرالى ءجيى ايتادى. مىسالى، "بەركۋتتىڭ" ميتينگكە شىققان ستۋدەنتتەردى اياماي سوققىعا جىققانى ۋكراينالىقتار اراسىندا ۇلكەن جانجال بولعان ەدى. بۇعان قاتىستى زەلەنسكي جەتەكشىلىك ەتەتىن "95-ي كۆارتال" ازىلدەگەن ەدى.
ازىلكەش ەۆگەني كوشەۆوي سول كەزدەگى ەل پرەزيدەنتى ۆيكتور يانۋكوۆيچتى سومداپ تۇرعان اكتەردەن "بەركۋتتىكتەرگە" ەبونيت تاياقشالارىن بەرىپ، ال ميتينگكە شىققاندار جۇننەن توقىلعان كيىم كيسە، سولاردى ۇرۋ ارقىلى ەلەكتر الۋعا بولا ما؟" دەپ سۇرايدى.
زەلەنسكيدىڭ ءوزى ميتينگكە شىقپاي، نەگە ساحنادا عانا وسىنداي ازىلدەر ايتىپ جۇرگەنىن ءتۇسىندىردى. ء"بىزدىڭ پلاتفورمامىز - بۇل "ۆەچەرني كۆارتال". ميتينگكە شىققاندارعا يۋمورمەن قولداۋ كورسەتىپ، بيلىك، وپپوزيتسيا تۋرالى ەركىن ازىلدەي الۋىمىز كەرەك", - دەگەن بولاتىن.
سونىمەن قاتار، زەلەنسكي رەسەي ساياساتىنا قارسى دا ءجيى ءازىل ايتادى. سونىڭ سالدارىنان رەسەيدە "ۆەچەرني كۆارتال" شوۋىن تەلەۆيزيادان كورسەتۋگە تىيىم سالىنعان. بىراق ۋكراينا پرەزيدەنتىنە ۇمىتكەر ءوز سۇحباتتارىنىڭ بىرىندە قاجەت بولسا ءپۋتيننىڭ الدىندا تىزەرلەپ وتىرۋعا دا دايىن ەكەنىن ايتقان: "قالاساڭىزدار، پۋتينگە جالىنىپ، الدىندا تىزەرلەۋگە دايىنمىن، بىراق ۋكراينانى تىزە بۇكتىرمەڭىزدەرشى".
فوتولار زەلەنسكيدىڭ Facebook پاراقشاسىنان
ۋكراينا پرەزيدەنتتىگىنە باستى ۇمىتكەر زەلەنسكي ءوزىنىڭ پرەزيدەنتتىك سايلاۋعا تۇسەتىنىن رەسمي تۇردە 31 جەلتوقساندا ءدال جاڭا جىل قارساڭىندا ايتقان. "1+1" تەلەارناسى ءارتىستىڭ رەسمي حابارلاماسىن كورسەتۋ ءۇشىن سول كەزدەگى پرەزيدەنت پوروشەنكونىڭ جاڭاجىلدىق قۇتتىقتاۋىن كەيىنگە ىسىرىپ تاستاعان.
شوۋمەننىڭ پرەزيدەنتتىك سايلاۋعا ءتۇسۋىن ۋكراينا حالقى ءار ءتۇرلى قابىلدادى. ءبىرى "ساياساتتاعى جاڭا تىنىس" دەپ ساناسا، كەيبىرى ۋكراينالىق وليگارح يگور كولومويسكيدىڭ "قۋىرشاعى" دەپ ويلايدى. بىراق زەلەنسكي وليگارحپەن تەك ىسكەرلىك قارىم-قاتىناستا ەكەنىن ايتادى.
شوۋمەننىڭ پرەزيدەنت سايلاۋىنا تۇسىۋىنە ەلدەگى ساياسي احۋال سەبەپ بولعان.
ء"ار ۋكراينالىقتىڭ باستى ماقساتى - ادام ءومىرىن ساقتاۋ. سوندىقتان، ءبىرىنشى قادام - وق اتۋدى توقتاتۋ. تاراپتارمەن كەلىسسوز جۇرگۋىمىز كەرەك. ۇلىبريتانيا، اقش-تى وزىمىزگە تارتۋىمىز قاجەت دەپ ويلايمىن", - دەيدى زەلەنسكي.
ازىلكەشتىڭ ايتۋىنشا، ونىڭ پرەزيدەنت رەتىندەگى العاشقى ماقساتى - ەلدەگى سوعىستى توقتاتۋ، ۋاقىتشا وككۋپاتسيالانعان ايماقتاردى قايتارۋ. شوۋمەن پرەزيدەنت سايلاۋىنىڭ العاشقى تۋرى 1 ساۋىردە اياقتالاتىنى ءوزى ءۇشىن ۇتىمدى جايت ەكەنىن ايتادى: "1 ءساۋىر - مەن ءۇشىن تاماشا كۇن. سايقىمازاق ءۇشىن. جەڭىسكە جەتۋ ءۇشىن. مەن سايقىمازاق ەمەسپىن بە؟", - دەيدى ول. سوڭعى مالىمەتتەر بويىنشا، زەلەنسكي ءبىرىنشى تۋردان سوڭ 30,25 پايىز داۋىسپەن كوش باستاپ كەلەدى. ەكىنشى ورىنداعى پەتر پوروشەنكودا - 16,54 پايىز. ەندى ەكى كانديدات ءۇش اپتادان كەيىن سايلاۋدىڭ ەكىنشى تۋرىنا قاتىسادى. پوروشەنكو ءوزىنىڭ باستى قارسىلاسىن "كولومويسكيدىڭ قۋىرشاعى" دەپ اتاعان ەدى. ال زەلەنسكيدىڭ قازىرگى پرەزيدەنت تۋرالى پىكىرى مىناداي: "پوروشەنكونى ەكى-اق سوزبەن سيپاتتاپ بەرە الامىن - "وكىنىشكە قاراي".
ەسەت تولەش
Tengrinews.kz
