بۇگىن – مۇحتار اۋەزوۆتىڭ قايتقان كۇنى

9022
Adyrna.kz Telegram
https://adyrna.kz/content/uploads/2023/06/347b315f-f49d-4cd2-889d-f6adae50cd5a.jpeg
بۇگىن — قازاقتىڭ ەلدىگى مەن رۋحانياتىنا ولشەۋسىز ۇلەس قوسقان زاڭعار جازۋشى مۇحتار اۋەزوۆتىڭ قايتقان كۇنى. قازاقستان عىلىم اكادەمياسىنىڭ تۇڭعىش اكادەميگى 1961 جىلدىڭ 27 ماۋسىمىندا ماسكەۋ قالاسىنداعى اۋرۋحانادا ومىردەن وزعان ەدى. ول 63 جىلدىق عۇمىرىن قازاق ادەبيەتىنىڭ دامۋىنا ارنادى. ارتىنا باي مۇرا قالدىرىپ، ەلدىڭ وقۋ-اعارتۋ ىسىنە، دراماتۋرگيا سالاسىنا  زور ۇلەس قوستى. قازاقتىڭ ءبىرتۋار كلاسسيك جازۋشىسى 20 جاسىندا ءوزىنىڭ تۇڭعىش كولەمدى تۋىندىسى «ەڭلىك-كەبەك» پەاساسىن جازدى. بۇل تۋىندى ءالى كۇنگە دەيىن قازاق ساحناسىنان تۇسپەي كەلەدى. ءدال وسى شىعارمادان كەيىن اۋەزوۆ ون شاقتى جىل ىشىندە كوپتەگەن اڭگىمە، پوۆەست، پەسالارىمەن كوزگە ءتۇستى. اتاپ ايتقاندا «قورعانسىزدىڭ كۇنى»، «بارىمتا»، «ەسكىلىك كولەڭكەسىندە»، «كوكسەرەك»، «قىر» اڭگىمەلەرى، «جەتىم»، «قاراش-قاراش وقيعالارى»، «قارالى سۇلۋ»، «قيلى زامان» سەكىلدى پروزالىق شىعارمالارى وقىرمان نازارىن بىردەن وزىنە اۋداردى. «اباي جولى» رومان-ەپوپەياسى —جازۋشىنىڭ ەڭ كولەمدى ءارى اسا كۇردەلى شىعارماسى. تۋىندىدا كلاسسيك جازۋشى ءبىر عانا اباي وبرازى ارقىلى ءحىح عاسىردىڭ ءىى جارتىسىنداعى قازاق حالقىنىڭ ءومىرىن جان-جاقتى سۋرەتتەيدى. «ادىرنا» ۇلتتىق پورتالى نازارلارىڭىزعا مۇحتار اۋەزوۆتىڭ قاناتتى سوزدەرىن ۇسىنادى.

تۋماي جاتىپ – تولدىم دەمە، تولماي جاتىپ – بولدىم دەمە.

***

كىمدە-كىم انا ءتىلىن، ادەبيەتىن سىيلاماسا، باعالاماسا، ونى ساۋاتتى، مادەنيەتتى ادام دەپ ساناۋعا بولمايدى.

***

جالعان نامىس – قاسيەت ەمەس، ار ساقتاعان – قاسيەت.

***

بەرەكەنى كوكتەن تىلەمە، ەتكەن ەڭبەكتەن تىلە.

***

ءتوزىم تاماشا سيپات. بىراق شەكسىز ۇزاق توزۋگە ءومىر تىم قىسقا عوي.

***

قاي ءىستىڭ بولسىن ونۋىنە ءۇش شارت بار: ەڭ اۋەلى – نيەت كەرەك، ودان سوڭ – كۇش كەرەك، ودان سوڭ – ءتارتىپ كەرەك.

***

ءوز توپشىلاۋىم بويىنشا، ادامنىڭ قاي مىنەزى قاسيەتتى بولسا، سول مىنەزى ءمىنى دە بولادى.

***

ۇل تاربيەلەي وتىرىپ، حالىقتى تاربيەلەيمىز، قىز تاربيەلەي وتىرىپ، ۇلت تاربيەلەيمىز.

پىكىرلەر