مۇمكىندىگى شەكتەۋلى ايەلدەردىڭ اراسىندا بالالى بولىپ، ءبىر ادامعا ەكىنشى ءومىر سىيلاپ جاتقان ادامدار بارشىلىق. الايدا دارىگەرلەردىڭ اراسىندا مۇنداي ادامداردىڭ بالالى بولۋىنا قارسى ادامدار كەزدەسىپ قالادى. مىنە وسىنداي ادامدارعا تاراز قالاسى ءماسليحاتىنىڭ دەپۋتاتى ءارى "مۇگەدەكتەردىڭ جاستار قوعامى" قوعامدىق بىرلەستىگىنىڭ ءتورايىمى ايگەرىم داۋلەتباەۆا قول ۇشىن سوزىپ جاتادى.
ايگەرىم ماراتبەكقىزى ءوزىنىڭ جەكە ارالاسۋىمەن 2010 جىلدان باستاپ تاراز قالاسىندا 20 بالا دۇنيەگە كەلگەننىن ايتادى. سونداي-اق ول مۇمكىندىگى شەكتەلى انالاردىڭ بالالارى ساپ-ساۋ بولىپ تۋىلعانىن ەسكەرتتى.
«جۋىردا جيىرماسىنشى بالا دۇنيەگە كەلدى. ءوزم پەرزەنتحاناعا بارىپ، ارى بەرى شاپقىلاپ ءجۇرىپ ءسابيدىڭ دۇنيەگە اكەلدىك. شىنى كەرەك دارىگەرلەر مۇگەدەك انانىڭ بالالى بولعانىنا كەدەرگى بولىپ جاتادى. سەبەبى ولار ستاتيستيكانى بۇزىپ، جاعدايدى قيىنداتقىسى كەلمەيدى. مىسالى دەنى ساۋ ادام اپتاسىنا ءبىر رەت ەمحاناعا بارۋ كەرەك بولسا، ال مۇگەدەك ادام كۇن سايىن دارىگەرگە قارالىپ وتىرۋى كەرەك. ەگەر مۇمكىندىگى شەكتەۋلى انانىڭ بالاسى شەتىنەپ كەتسە، ەمحانا مەن اۋرۋحانانىڭ رەيتينگىسى ءتۇسىپ، جوعارى جاقتان سوگىس ەستيدى. سوندىقتان دا ولار مۇمكىندىگى شەكتەۋلى انانىڭ بالالى بولعانىنان قاشادى. بىراق قۇدايعا شۇكىر سوڭعى 2-3 جىلدان بەرى جاعداي تۇزەلىپ كەلە جاتىر. ويتكەنى دارىگەرلەر مەن بارعان كەزدە تاعى دا ايقاي-شۋ شىعارادى دەپ قايمىعادى. جۋىردا ءبىر قىزىم بوسانىپ، بەسىك تويىن جاسادىق. ونىڭ كوزىنەن ماسەلە بولعاندىقتان بالاسىنىڭ كوزى كورمەي قالاما دەپ ۋايىمداپ ەدىك. قۇدايعا شۇكىر كىشكەنتاي ءسابيدىڭ كوز جانارى جاقسى كورەتىن بولىپ شىقتى»، – دەيدى ول.
34 جاستاعى ءبىرىنشى توپ مۇگەدەگى اقكەنجە احمەتوۆا ەكى جىل بۇرىن ۇل بوسانعان بولاتىن. قولاربادا وتىراتىن ازامات مۇمكىندىگىم شەكتەۋلى دەپ قاراپ وتىرماي
ينۆاتاكسي قىزمەتىندە ديسپەتچەر بولىپ جۇمىس ىستەيدى.
«ۇلىم قازىر ەكى جاستان استى. 32 جاسىمدا ۇلىمدى كوتەرگەن كەزدە، دارىگەرلەر تىركەۋگە الماي قويدى. «ەندى نە بولار ەكەن؟» دەپ جىلاپ، قاتتى قينالعان كەزدە ايگەرىم ماراتبەكقىزىنىڭ كومەگى ءتيىپ، دارىگەرلەرگە ءمان-جايدى ءتۇسىندىردى. ارنايى تىركەۋگە الاتىن ۋاقىت ءوتىپ بارا جاتسا دا، مەنى ولار تىزىمگە العىسى كەلمەدى. ويتكەنى مۇگەدەكتىگى بار ادامداردى بوساندىرۋ ولار ءۇشىن پروبلەما بولىپ سانالادى. ەرتەڭ بىزگە ءبىر قيىن جاعداي بولسا، جاۋاپكەرشىلىكتى دارىگەر ارقالايدى. ول كەزدە ءوزىم جالدامالى پاتەردە تۇرامىن. سوندىقتان دا دارىگەرلەر «سەنىڭ تۇراتىن پاتەرىڭ جوق. بالانى قالاي باعاسىڭ؟» دەپ ۇرىستى. بىراق ولاردىڭ ماعان بۇلاي ايتۋعا ەشقانداي قاقىسى جوق ەدى. ولاردىڭ ماعان ايتقان سوزدەرى ءۇشىن سوتقا بەرۋىمە بولار ەدى. بىراق مەن ولاردى سوتقا بەرگەن جوقپىن. دارىگەرلەر مۇگەدەك ادام ەكى قابات بولسا، ونى ولار ەرسى كورەدى. ال ساۋ ادامدار اجىراسىپ نەمەسە 15-16 جاستا تۋسا قالىپتى جاعداي بولىپ سانالادى. ال مەن 18 جاستان اسقان ادام بولسام دا «اكە-شەشەڭدى شاقىرىپ كەل، ولار قولحات جازىپ بەرسىن» دەپ ايتتى. اللاعا شۇكىر ۇلىمنىڭ 12 مۇشەسى ساۋ، اقىل-ەسى ءبۇتىن بولىپ تۋىلدى. دارىگەرلەر «دەنى ساۋ ما ەكەن؟» دەپ ساۋساقتارىن ساناپ تەكسەردى. ال مەندە بالام «ساۋ تۋىلماسپا ەكەن؟» دەگەن وي مۇلدە بولعان جوق. ورازا ايىندا تۋىلعان سوڭ اتىن رامازان دەپ قويدىم. ءبىز سياقتى ادامدارعا بالالى بولۋ ودان سايىن جىگەرلى بولا تۇسۋگە كۇش بەرەدى. بىلتىر ۇكىمەت تاراز قالاسىنداعى 15 مولتەك اۋداننان ەكى بولمەلى پاتەر بەردى»، – دەيدى ول.
رەداكتسيا تاڭداۋى
