قازى اساپ، قىمىز-بالمۇزداق جەيتىن جاز. جاس عالىم ەرەكشە ادىسپەن قىمىزدان بالمۇزداق جاساپ شىعاردى

1651
Adyrna.kz Telegram
تۇركىستان وبلىسىندا جاس عالىم، كوللەدج وقىتۋشىسى جادىرا بايدالى قىمىزدان بالمۇزداق جاساپ، تابيعي ونىمدەردىڭ قاتارىن مولايتتى،  دەپ حابارلايدى "ادىرنا" ۇلتتىق پورتالى zakon.kz-كە سىلتەمە كورسەتە وتىرىپ. 

بويجەتكەننىڭ سوزىنشە ونىڭ باستى ماقساتى – ۇلتتىق بالمۇزداقتىڭ بيولوگيالىق قۇندىلىقتارعا باي جانە ادام اعزاسىنا پايدالى ەكەنىن دالەلدەۋ. بيە سۇتىنەن جاسالعان بالمۇزداق باسقالارعا ۇقساماي وتتا پىسەدى، قۇرامى وزگەرمەيدى، تابيعي تازا ءونىم رەتىندە پايدالانىلادى.

ء"بىزدىڭ نارىقتا ۇلتتىق جانە پايدالى قىمىزدان جاسالعان ءونىم تۇرلەرى جەتىسپەيدى. بالمۇزداق جاستاردىڭ دا، بالالاردىڭ دا كوڭىلىنەن شىعادى. ول بيوونىمدەردى پايدالانۋ ارقىلى حالقىمىزدىڭ دەنساۋلىعىنا وڭ اسەر ەتەدى", - دەدى جادىرا بايدالى.

ونەرتاپقىشتىڭ حابارلاۋىنشا، سۋسىننىڭ قۇرامى تابيعي يممۋندىق قاسيەتى بار دارۋمەندەرگە باي جانە ادام دەنساۋلىعىنا پايدالى تۇيىرشىكتى اقۋىزدار مول.

مۇنىمەن قوسا، جاس وقىتۋشى جادىرا بايدالى ساۋمال قوسىپ جاسالعان سابىن شىعارۋدى قولعا العان. ءوزى مۇنداي سابىننىڭ ادام دەنساۋلىعىنا ەمدىك قاسيەتى بار ەكەندىگىن ايتىپ وتىر.

ورايى كەلگەندە ايتا كەتەيىك، اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ دوتسەنتى گۇليا اليحانقىزى قىمىزدى حالىقارالىق نارىققا شىعارىپ، الەمگە تانىتۋ ءۇشىن جاڭا تەحنولوگيالاردى قولدانىپ، ۇنتاق تۇرىندە دە شىعارۋ كەرەك ەكەندىگىن ايتقان ەدى. عالىمنىڭ پايىمداۋىنشا، بۇل جاعىنان گەرمانيا بىزدەن كوش ىلگەرى تۇر. ولار قازىر قىمىزدىڭ ۇنتاعىن عانا ەمەس، تابلەتكا ءتۇرىن دە جاساپ شىعارىپ جاتىر.

سونىمەن قاتار، mezgil.kz پورتالىنىڭ جازۋىنشا,  نەمىس كاسىپكەرى گانس تسولماننىڭ وسىدان ەكى جىل بۇرىن قىمىزدىڭ  دارۋمەندەرگە باي ەكەنىن ەسكەرىپ، قىمىز ءسوزىن «كۋمىلاك» دەپ الماستىرىپ، پاتەنتتەپ العان.  قازاقتىڭ جابى تۇقىمدى جىلقىلارىن ءوسىرىپ، ودان ءونىم الىپ  وتىرعان گانس تسولمان ساۋمالدىڭ قۇرعاق ءتۇرىن جاساي الاتىنىن دا جاسىرماعان بولاتىن. شەتەلدىكتەر قىمىزدان بالمۇزداق جاساپ، كوسمەتيكالىق تاۋارلار وندىرۋگە كىرىسكەن. ال قىتايلار قىمىزدىڭ كوپ اۋرۋعا ەم ەكەنىن زەرتتەپ، دارىلەر وندىرۋگە بەت بۇرعانى ايتىلادى.

"ادىرنا" ۇلتتىق پورتالى

پىكىرلەر