ەلوردادا «استانا – مەنىڭ وتانىمنىڭ ەلورداسى» اتتى الەۋمەتتىك تۋرى ءوتتى

استانا قالاسى اكىمدىگى ەلوردانىڭ 25 جىلدىعىنا وراي «استانا – مەنىڭ وتانىمنىڭ ەلورداسى» اتتى الەۋمەتتىك تۋرىن باستادى. جوبا شەڭبەرىندە ەلىمىزدىڭ تۇكپىر-تۇكپىرىنەن كەلگەن 1000 بالا باس شاھاردىڭ كورىكتى جەرلەرىن تاماشالاۋعا كەلەدى. ولاردىڭ قاتارىندا از قامتىلعان جانە كوپبالالى وتباسىلاردىڭ بالالارى مەن ءتۇرلى سايىستاردىڭ جەڭىمپازدارى بار. بالالار 3 كۇندىك جولداما ارقىلى استانانىڭ بىرقاتار تاريحي-مادەني نىسانىمەن تانىساتىن بولادى. العاشقى بولىپ كەلگەن اباي وبلىسىنىڭ وقۋشىلارى بۇگىن مارە-سارە بولىپ ۇيلەرىنە قايتتى. بالالار 3 كۇن ىشىندە «بايتەرەك» مونۋمەنتىن، «نۇر الەم» بولاشاق ەنەرگياسى مۋزەيىن، قر تۇڭعىش پرەزيدەنتىنىڭ مۋزەيىن، قر ۇلتتىق مۋزەيىن، «حان شاتىر» ساۋدا ويىن-ساۋىق ورتالىعىن ارالاپ، وكەاناريۋم، دجۋنگلي، قازاقستانداعى ەڭ ۇلكەن شولۋ دوڭگەلەگى، باتۋت ساياباعى سياقتى ساۋىقتىرۋ ورىندارىنا باردى. بۇل ولاردىڭ ساياحاتتارىن قىزىقتى ءارى كوڭىلدى وتكىزۋىنە مۇمكىندىك بەردى. «ءبىز قالانىڭ ىشىندەگى كوپتەگەن نىسانداردىڭ تاريحىمەن تانىستىق. استانا – ەلىمىزدەگى تازا ءارى اسەم قالالاردىڭ ءبىرى. بالالار ءۇشىن بۇل دەمالىس جان-جاقتى ۇيىمداستىرىلعان. ولار باعدارلاما بارىسىندا مۇراجاي، ساياباق جانە ويىن-ساۋىق كەشەندەرىنە باردى»، - دەپ اسەرىمەن ءبولىستى وقۋشى قۋانىش سەمبەكوۆ. جوباعا جاۋاپتى قالالىق ينۆەستيتسيالار جانە كاسىپكەرلىكتى دامىتۋ باسقارماسىنىڭ ءبولىم باسشىسى ومىرزاق تىلەۋجاننىڭ سوزىنشە، بالالاردىڭ ساياحاتىن استانا قالاسىنىڭ اكىمدىگى تولىقتاي قارجىلاندىرعان. جاتىن ورنىمەن جانە ءۇش مەزگىل تاماقپەن قامتىلعان. قالا ىشىندە ارنايى اۆتوبۋسپەن جۇرەدى. «جالپى بۇل تۋر ءبىرىنشى رەت ۇيىمداستىرىلىپ وتىرعان جوق. پاندەمياعا دەيىن ءۇش جىل قاتارىنان وتكىزگەنبىز. مىنە سودان كەيىن 4 جىل وتكەندە قالامىزدىڭ شيرەك عاسىرلىق مەرەيتويىنا وراي جوبانى جاڭا فورماتتا قايتا جاڭعىرتا وتىرىپ جۇزەگە اسىرىپ جاتىرمىز»، – دەيدى ومىرزاق تىلەۋجان. جوبا مۇنىمەن توقتاپ قالمايدى. ءارى قاراي الماتى قالاسىندا جالعاسىن تاباتىن بولادى.