بۇگىن شىمكەنت قالاسىندا 7 مامىر – وتان قورعاۋشىلار كۇنىنە ارنالعان سالتاناتتى جيىن ءوتتى. ساحنا تورىنە ەلىمىزدىڭ مەملەكەتتىك تۋى سالتاناتتى جاعدايدا شىعارىلىپ، مەملەكەتتىك گيمنى شىرقالىپ، كوپشىلىكتىڭ رۋحىن كوتەرىپ تاستادى.
سالتاناتتى جيىنعا شىمكەنت قالاسىنىڭ اكىمى مۇرات ايتەنوۆ قاتىسىپ، جاۋىنگەرلەردى مەرەكەسىمەن قۇتتىقتادى.
—بۇل – حالقىمىزعا ءتان باتىرلىقتىڭ جانە وتانسۇيگىشتىكتىڭ مەرەكەسى. بابالارىمىز اق بىلەكتىڭ ۇشىمەن، اق نايزانىڭ كۇشىمەن كەڭ بايتاق دالامىزدى قورعاپ، بۇگىنگى ۇرپاققا اماناتتاپ قالدىرعان.
بابالاردىڭ اماناتىنا ادال بولۋ – بۇگىنگى ۇرپاقتىڭ پەرزەنتتىك پارىزى.
سەبەبى، تاريح قويناۋىنداعى ەرلىككە تولى جەڭىستى جولىمىز ۇرپاق جادىندا ماڭگى ساقتالۋى ءتيىس. بيىل قازاقستان قارۋلى كۇشتەرىنىڭ قۇرىلعانىنا 31 جىل تولىپ وتىر. وسى جىلدار ىشىندە ۇلتتىق ارميامىز ءتۇرلى دامۋ ساتىلارىنان ءوتىپ، جىلدان جىلعا قۋاتى ارتىپ كەلەدى. بۇگىندە دايىندىق دەڭگەيى جوعارى، جاۋىنگەرلىك رۋحى اسقاق، زاماناۋي قارۋ-جاراق جانە اسكەري تەحنيكامەن جابدىقتالعان.
ءبىر اۋىز سوزبەن ايتساق، ايبىندى ارميامىز – تۇعىرلى تاۋەلسىزدىگىمىز مەن مەملەكەتىمىزدىڭ بەرىك قورعانى بولىپ تابىلادى، - دەدى مۇرات دۇيسەنبەكۇلى.
م.ايتەنوۆتىڭ ايتۋىنشا، الەمدە قالىپتاسقان گەوساياسي احۋال ەل تاۋەلسىزدىگى مەن تەرريتوريالىق تۇتاستىقتى قورعاۋدى، ۇلتتىق قاۋىپسىزدىكتى قامتاماسىز ەتۋدى قاي كەزدەگىدەن دە وزەكتى ماسەلەگە اينالدىرىپ وتىر.
—وتان قورعاۋ – پەرزەنتتىك پارىز، مارتەبەلى مىندەت. ەلىمىزدىڭ تىنىشتىعى مەن جەرىمىزدىڭ تۇتاستىعىن ساقتاۋ جولىندا قالتقىسىز قىزمەت ەتىپ جۇرگەن ەرجۇرەك جاۋىنگەرلەرىمىزدىڭ ەڭبەگى ەرەن. حالقىمىز انتىنا ادال، سەرتىنە بەرىك پەرزەنتتەرىن قادىر تۇتادى، - دەدى شاھار باسشىسى.
سالتاناتتى جيىندا قالا اكىمى م.ايتەنوۆ بىرقاتار اسكەري قىزمەتكەرلەردى العىس حاتپەن ماراپاتتادى.
سونىمەن قاتار جيىندا «وڭتۇستىك» وڭىرلىك قولباسشىلىعى اسكەرلەرىنىڭ قولباسشىسى، گەنەرال-مايور مەرەكە كوشەكباەۆ قارۋلى كۇشتەردىڭ ارداگەرلەرى مەن جاۋىنگەرلەردى مەرەكەسىمەن قۇتتىقتاپ، ءمىنسىز قىزمەت اتقارعان ساردارلار مەن ساربازداردى ماراپاتتادى.
جيىننىڭ سوڭى شىمكەنت اسكەري گارنيزونى ساربازدارى، قالاداعى اسكەري وقۋ ورىندارى كۋرسانتتارى مەن ەسترادا جۇلدىزدارى قاتىسقان مەرەكەلىك كونتسەرتكە ۇلاستى.
