شىمكەنت قالاسىندا 9 مامىر – جەڭىس كۇنى مەرەكەسى جوعارى دەڭگەيدە اتاپ ءوتىلدى. مەرەكەگە وراي اباي ساياباعىندا ورنالاسقان داڭق مونۋمەنتىندەگى ماڭگىلىك الاۋعا گۇل شوقتارىن قويۋ ءراسىمى ءوتتى.
وعان شىمكەنت قالاسىنىڭ اكىمى مۇرات ايتەنوۆ پەن قالالىق ءماسليحاتتىڭ توراعاسى باحادىر نارىمبەتوۆ، سوعىس جانە تىل ارداگەرلەرى مەن قازا بولعان جاۋىنگەرلەردىڭ ۇرپاقتارى، اسكەري قىزمەتشىلەر مەن قۇقىق قورعاۋ ورگاندارىنىڭ قىزمەتكەرلەرى دە قاتىستى.
جينالعان كوپشىلىك ۇلى وتان سوعىسى جىلدارىندا مايداندا قازا تاپقان جاۋىنگەرلەردى ءبىر مينۋت ۇنسىزدىكپەن ەسكە الىپ، ولاردىڭ رۋحىنا تاعزىم ەتتى.
ايتا كەتەيىك، 1941-1945 جىلدارى شىمكەنت قالاسى مەن وڭتۇستىك وڭىردەن 140 مىڭنان استام جاۋىنگەر سوعىسقا اتتانىپ، ولاردىڭ جارتىسىنا جۋىعى تۋعان جەرىنە قايتا ورالماعان.
گۇل شوقتارىن قويۋ راسىمىنەن كەيىن قالا اكىمى م.ايتەنوۆ اباي ساياباعى اۋماعىندا ارنايى جاساقتالعان دالالىق-اسكەري لاگەرگە كەلىپ، سوعىس جانە تىل ارداگەرلەرىمەن بىرگە تەاترلاندىرىلعان قويىلىمدى تاماشالادى. وندا ونەرپازدار مايدان دالاسىنان كورىنىستەر قويىپ، سوعىس جىلدارىنىڭ ايگىلى اندەرىن شىرقادى.
