رەسەيلىكتەردىڭ 70 پايىزى ءستاليننىڭ تاريحتاعى رولىنە وڭ باعا بەرەدى. "لەۆادا-تسەنتر" ورتالىعى جۇرگىزگەن ساۋالناماعا سايكەس، جاۋاپ بەرگەن ازاماتتاردىڭ تەڭ جارتىسىنا جۋىعى ستالين رەپرەسسياسىن اقتاۋعا دايىن.
2019 جىلى ناۋرىزدا ورتالىق جۇرگىزگەن ساۋالناماعا قاتىسقان ءاربىر ەكىنشى ادام (51 پايىز) ستالينگە سۇيسىنەتىنىن نە قۇرمەتپەن قارايتىنىن ايتقان. "اتىن ەستىگەندە تىتىركەنەمىن", "قورقامىن" نە "جيەركەنەمىن" دەپ ستالينگە نەگاتيۆتى قارايتىندار سانى ءۇش ەسە از - 14 پايىز.
ساۋالناماعا قاتىسقانداردىڭ 19 پايىزى ءستاليننىڭ رەسەي تاريحىنداعى رولىنە تەرىس باعا بەرگەن.
ستالين مەن ونىڭ تاريحتاعى رولىنە وڭ باعا بەرەتىندەر اراسىندا رەسەي كوممۋنيستىك پارتياسىن جاقتايتىندار عانا ەمەس، پرەزيدەنت سايلاۋىندا ۆلاديمير پۋتين مەن ۆلاديمير جيرينوۆسكيگە داۋىس بەرگەندەر دە بار. الەۋمەتتانۋشىلار سوزىنشە، بارلىق جاس ساناتى بويىنشا ستالينگە وڭ باعا بەرەتىندەر باسىم تۇسكەن.
ساۋالناما قورىتىندىسى بويىنشا، "ستالين تۇسىندا ازاماتتاردىڭ رەپرەسسياعا ۇشىراۋىن اقتاۋعا بولمايدى" دەگەن ويدى رەسەيلىكتەردىڭ 45 پايىزى قولدايدى. 2008 جىلى بۇل كورسەتكىش 60 پايىز ەدى.
2017 جىلى "لەۆادا-تسەنتر" سوڭعى 27 جىلدا ستالينگە وڭ قارايتىن ادامدار سانى ءۇش ەسە ارتقانىن حابارلاعان.
2019 جىلى سسسر-دا جاپپاي قىرىپ-جويۋ رەپرەسسياسىنىڭ باستالعانىنا 82 جىل تولادى. قازاقستان دا ودان تىس قالمادى. زەرتتەۋشىلەردىڭ ايتۋىنشا، سوۆەت بيلىگى كەزىندە قازاق سسر-ىندە 3,5 ميلليون ادام رەپرەسسياعا ۇشىراعان. تۇتقىنداۋ مەن اتۋ جازاسىنىڭ باسىم كوبى بيلىكتە يوسيف ستالين وتىرعان كەزدە بولدى.
"ازاتتىق" راديوسى
