تارازداعى فوسفور زاۋىتىندا جارىلىس بولىپ، جۇمىسشىلار حيميالىق كۇيىك الدى، دەپ حابارلايدى «ادىرنا» ءتىلشىسى.
بۇل سەرىكتەستىك «قازفوسفات» جشس-گە قارايدى. توتەنشە جاعداي 3 تامىز كۇنى ساعات 11:30 شاماسىندا بولعان.
«سارى فوسفور قويماسىنىڭ تەرريتورياسىندا № 7 تسەحتىڭ قارا جۇمىسشىسى ورمانوۆ دانيار جانە № 31 شيكىزات دايىنداۋ تسەحىنىڭ اعا ينجەنەرى قالدىباي شاحاديار حيميالىق كۇيىك الدى. زارداپ شەككەندەر №1 قالالىق اۋرۋحاناعا جەتكىزىلدى. جۇمىس كىلت توقتاتىلىپ، وقيعا ورنى قورشالدى»،—دەپ ءتۇسىندىردى جاۋاپكەرشىلىگى شەكتەۋلى سەرىكتەستىك.دارىگەرلەردىڭ ايتۋىنشا، ناۋقاستارعا تەرميالىق كۇيىكتىڭ 2-3 كەزەڭى، 22% كۇيگەن دەگەن دياگنوز قويىلعان. جازاتايىم وقيعانىڭ الدىن الا سەبەبى - قاۋىپسىزدىك ەرەجەلەرىن ساقتاماۋ. قازىرگى تاڭدا تەرگەۋ جۇمىستارى جۇرگىزىلىپ جاتىر.
