گۇل دۇكەنىندە داۋ شىعارعان پوليتسيا دەپارتامەنتىنىڭ قىزمەتكەرلەرىنە قاتىستى تەرگەۋ باستالدى. بۇل تۋرالى وزىندىك قاۋىپسىزدىك دەپارتامەنتى مالىمدەدى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، وزىندىك قاۋىپسىزدىك دەپارتامەنتى بۇرىنعى ۋچاسكەلىك ينسپەكتور مۇحتار بەكوۆتىڭ "ROMANTIC" گۇل سالونى مەن "Eldorado" رەستو-بارىنىڭ جۇمىسشىلارىنا قاتىستى جاساعان زاڭسىز ارەكەتتەرىنە بايلانىستى بۇقارالىق اقپارات قۇرالدارىندا تارالعان مالىمەتتەردى تەكسەردى.
بەكوۆكە قاتىستى قازاقستان رەسپۋبليكاسى قىلمىستىق كودەكسىنىڭ 191-بابىنىڭ 2-بولىگى "توناۋ" بويىنشا سوتقا دەيىنگى تەرگەۋ باستالدى.
شىمكەنت قالاسى پوليتسيا دەپارتامەنتى قىزمەتكەرلەرىنىڭ ءىس-ارەكەتتەرىنىڭ زاڭدىلىعىن قازاقستان رەسپۋبليكاسى قىلمىستىق كودەكسىنىڭ 371-بابىنىڭ 1-بولىگى "سالعىرتتىق" بويىنشا باستالعان سوتقا دەيىنگى تەرگەپ-تەكسەرۋ بارىسىندا وزىندىك قاۋىپسىزدىك بولىمشەسى تەكسەرەتىن بولادى، دەلىنگەن حابارلامادا.
ۆەدومستۆو ەكى قىلمىستىق ءىس بويىنشا جۇرگىزىلىپ جاتقان تەرگەۋدىڭ وبەكتيۆتىلىگى مەن جان-جاقتىلىعىن قامتاماسىز ەتەتىن بولادى.
ەسكە سالايىق، بۇعان دەيىن گۇل ساتۋشىنىڭ سوققىعا جىققان ەكس-پوليتسەيدىڭ ۇستىنەن قىلمىستىق ءىس قوزعالعانى تۋرالى حابارلاعان ەدىك. ودان كەيىن گءۇل ساتۋشىنى سوققىعا جىققان ەكس-پوليتسەيدىڭ تاعى ءبىر وقيعاعا قاتىسى بار ەكەنى انىقتالدى.
