وقۋ جىلى باستالۋعا تۋرا جارتى اي قالعاندا وقۋ-اعارتۋ ءمينيسترى مەكتەپتەگى حيدجاپ ماسەلەسى تۋرالى سۇراققا تاعى دا ناقتى جاۋاپ بەرمەدى.
جۋىردا وقۋ-اعارتۋ ءمينيسترى عاني بەيسەمباەۆتىڭ قاتىسۋىمەن وتكەن كەزدەسۋدە، وقۋشىلاردىڭ مەكتەپتە حيدجاپ كيۋ ماسەلەسى ءسوز بولعان ەدى. سول كەزدەسۋدە وقۋشىلاردىڭ حيدجاپ كيۋىن ماسەلە ەتىپ كوتەرگەن ازاماتتىڭ ۇسىنىسىن مينيستر قولداعانداي كەيىپ تانىتقان بولاتىن. عاني بەكتايۇلىنىڭ وسى ارەكەتى الەۋمەتتىك جەلىدە قىزۋ تالقىلانىپ، نارازىلىق تۋدىردى.
«كونستيتۋتسياعا سايكەستىك» قانداي بولادى؟
بۇگىن, 15 تامىزدا ۇكىمەت وتىرىسىندا ءدال وسى سۇراقتى عاني بەكتايۇلىنىڭ وزىنە قويدىق.
«حيدجاپ كيۋگە رۇقسات بەرەسىزدەر مە?» دەگەنسۇراققا مينيستر «ءبىز ءبىر نارسەنى ءتۇسىنۋىمىز كەرەك. ءبىز ءبارىمىز وعان كەلىستىك، كونستيتۋتسيادا جازىلعان، ءبىز زايىرلى مەملەكەتپىز. سوندىقتان مەكتەپتەر دە كونستيتۋتسياعا سايكەس ءومىر ءسۇرۋى كەرەك دەپ ەسەپتەيمىز» دەپ سىرعىتا جاۋاپ بەردى.
مينيستردەن ناقتى جاۋاپ بولماعان سوڭ«وقۋشىلار مەكتەپتە حيدجاپ كيە مە، كيمەي مە؟ناقتى جاۋاپ بەرىڭىزشى...» دەپ ىندەتە سۇراۋعا تۋرا كەلدى.
«مەن جاۋاپ بەردىم عوي. زايىرلى مەملەكەت بولعاننان كەيىن زايىرلى مەملەكەتتىڭ زاڭىن ورىنداۋعا ءتيىستىمىز. جالپى, ءبىز مەكتەپتە ءبىلىم داعدىلارىن قالىپتاستىرعان كەزدە ءبىزدىڭ مەملەكەتتىڭ زاڭدارىنا سايكەس، وقۋ پروتسەسى سول جەردەگى ۇدەرىستە جۇرگىزىلۋ كەرەك. سوندىقتان دا زاڭ قاي مەملەكەتتىك ورگاندا بولسا دا قاتاڭ ساقتالۋعا ءتيىستى. ءبىز وسى زاڭ جولىمەن جۇرەتىن بولامىز»، - دەدى مينيستر.
«مىندەتتى تۇردە ءبىلىم الۋ» ءۇشىن نە ىستەۋ كەرەك؟
عاني بەكتايۇلىنىڭ ناقتى سۇراققا قيپاقتاپ، اشىق جاۋاپ بەرمەگەنى تۇسىنىكسىز. 2022 جىلدىڭ ماۋسىم ايىندا اسحات ايماعامبەتوۆ ءبىلىم جانە عىلىم ءمينيسترى بولىپ تۇرعاندا حيدجاپقا قاتىستى سۇراققا بىلاي جاۋاپ بەرگەن بولاتىن.
«مينيسترلىكتىڭ ءتيىستى بۇيرىعى بار. ءبىز – زايىرلى مەملەكەتپىز. مەكتەپتەر دە زايىرلى مەكەمە. 2016 جىلدان بەرى قابىلدانعان بۇيرىق بار. ول وزگەرمەدى جانە ءوز كۇشىن جويعان جوق. ارينە، مەكتەپ فورماسىن ساقتاۋ كەرەك. الايدا شىندىققا تىكە قاراپ، پروبلەمانى جاسىرماۋىمىز قاجەت. وسى ماسەلەگە قاتىستى بالالاردىڭ مەكتەپكە بارماي جۇرگەن فاكتىلەرى دە بار. ءبىلىمنىڭ ينكليۋزيۆتى بولۋى وتە ماڭىزدى، ياعني وسى بالالارعا ءبىلىم بەرۋىمىز كەرەك. ول ونلاين فورماتتا دا بولۋى مۇمكىن. قازىر مەكتەپكە بارمايتىن بالالار نە ىستەپ جاتىر؟ مىسالعا ول بالالار «شەتەلدە وقيمىز» دەپ مەكتەپتەن قۇجاتتارىن الىپ كەتەدى. بىراق شىندىعىندا ولار قازاقستاننىڭ شەكاراسىنان سىرتقا شىعىپ، ەشقايدا بارمايدى. ەلىمىزدە ونلاين ءبىلىم بەرۋ بولماعاندىقتان كورشى مەملەكەتتەردىڭ ونلاين-مەكتەپتەرىنەن ءبىلىم وقىپ جاتىر. ال كەيبىرى ءتىپتى مەكتەپكە بارۋدى مۇلدە قويعان. ال مۇندايعا جول بەرۋگە بولمايدى. بالالارىمىز مىندەتتى تۇردە ءبىلىم الۋى كەرەك»، - دەگەن ەدى ايماعامبەتوۆ.
2021 جىلدىڭ قىركۇيەك ايىندا اسحات قاناتۇلى وقۋشىلار مەكتەپ فورماسى كيۋ كەرەك ەكەنىن ەسكەرتكەن بولاتىن.
«زايىرلى مەملەكەت بولعاننان كەيىن ءدىني ماسەلە,نە باسقا ماسەلە دەپ بولمەيمىز. مەكتەپتەردىڭ ەرەجەسى بار، مينيسترلىك بەكىتكەن ارنايى بۇيرىق بار. وسى بۇيرىقتىڭ شەڭبەرىندە جۇمىس ىستەۋىمىز كەرەك. حيدجاپ بولسىن، قىسقا يۋبكا بولسىن، مەكتەپ فورماسىنا سايكەس كەلمەيتىن باسقا دا كيىمدەرمەن مەكتەپكە كەلۋگە بولمايدى. تالاپ بارلىعىنا بىردەي. مەملەكەتتىك ستاندارت دەگەن بار، تالاپ بار، زاڭ بار، مەملەكەتتىك بولسىن، جەكەمەنشىك بولسىن، ءبىلىم بەرۋ ۇيىمدارى بەكىتىلگەن ەرەجەنى ورىنداۋى ءتيىس،» - دەگەن بولاتىن اسحات ايماعامبەتوۆ.
سەرىك جولداسباي
