بۇگىن قاراساي اۋدانى «GULNAR BAQ» دەمالىس جانە سپورت بازاسىندا اسا كورنەكتى مەملەكەت جانە قوعام قايراتكەرى، ءۇش مارتە سوتسياليستىك ەڭبەك ەرى دىنمۇحامەد قوناەۆتىڭ جۇلدەسىنە ارنالعان ۇلتتىق ات سپورتى تۇرلەرىنەن جانە جاعاجاي ۆولەيبولىنان الماتى وبلىسىنىڭ اشىق ءتۋرنيرى ءوتتى.
جارىستىڭ اشىلۋ سالتاناتىندا مەملەكەت باسشىسى ق.ك.توقاەۆتىڭ قۇتتىقتاۋ حاتىن ونىڭ كەڭەسشىسى مالىك نۇرجانۇلى وقىپ، ەل پرەزيدەنتىنىڭ ارنايى تىلەگىن جەتكىزدى. پرەزيدەنتتىڭ قۇتتىقتاۋ سوزىندە: «دىنمۇحاممەد احمەتۇلى قوناەۆ – قازاقستاندى ۇزاق جىل باسقارىپ، ەلىمىزدى وركەندەتۋگە ولشەۋسىز ۇلەس قوستى. حالقىنا ادال قىزمەت ەتىپ، جۇرتشىلىقتىڭ ىستىق ىقىلاسىنا بولەندى. حالقىمىز ۇلى تۇلعانىڭ ەلگە سىڭىرگەن ەڭبەگىن ەشقاشان ۇمىتپايدى. قاپشاعاي قالاسىنىڭ قوناەۆ بولىپ وزگەرتىلۋى – سونىڭ ايقىن دالەلى. ارداقتى ازاماتتىڭ ءومىر جولى وسكەلەڭ ۇرپاققا ءاردايىم ۇلگى-ونەگە بولارى ءسوزسىز» - دەلىندى.
سونىمەن قاتار، اتالعان شاراعا الماتى وبلىسى اكىمىنىڭ ءبىرىنشى ورىنباسارى نۇرلان ەرعاليۇلى، مەملەكەت قايراتكەرلەرى جانە ەلىمىزدىڭ ونەر، عىلىم، قۇرىلىس، اسكەري سالاداعى بەلگىلى ازاماتتارى قاتىسىپ، ىزگى تىلەكتەرىن ءبىلدىردى.
بىرنەشە جىل قاتارىنان وسى جارىستىڭ ۇيىمداستىرىلۋىنا مۇرىندىق بوپ كەلە جاتقان گەنەرال-لەيتەنانت امانگەلدى شابدارباەۆ ساحنادان بارلىق قوناقتارعا العىسىن جەتكىزدى. سونادي-اق، امانگەلدى سماعۇلۇلىنا الماتى وبلىسى اكىمى مارات سۇلتانعازيەۆتىڭ اتىنان ۇلتتىق سپورتتى دامىتۋعا قوسقان ۇلەسى ءۇشىن العىس حات تابىستالدى.
ۆولەيبول جارىسىنا بيىل 32 كوماندا قاتىسسا، بايگەگە ەلىمىزدىڭ بارلىق ايماعىنان سايگۇلىكتەر سايىسقا ءتۇستى.
جارىس ناتيجەسى تومەندەگىدەي.
توپ بايگە (15 شاقىرىم)
ءى. روزا اتى - يەسى مەرحات بۇلعىنوۆ (الماتى وبلىسى، تالعار اۋدانى)
ءىى. بۇلبۇل اتى - يەسى ارىستان كۇدەباەۆ (الماتى وبلىسى، جامبىل اۋدانى)
ءىىى. بايان اتى - يەسى ءالي نۇرمۇحامەتوۆ (جامبىل وبلىسى، قورداي اۋدانى)
الامان بايگە (25 شاقىرىم)
ءى. ايسۋات اتى - يەسى باقىتبەك مىرزاباەۆ (الماتى وبلىسى، جامبىل اۋدانى)
ءىى. پاديشا اتى - يەسى ءالىمتاي مولداسەيتوۆ (جامبىل وبلىسى، قورداي اۋدانى)
ءىىى. ساۋديا اتى - يەسى نايل فاحريەۆ (جامبىل وبلىسى، قورداي اۋدانى)
جەڭىمپازدارعا اۆتوكولىك كىلتى، ال جۇلدەگەرلەرگە اقشالاي سىياقى تابىس ەتىلدى.
سپورتتىق شارا اياقتالعان سوڭ 2000 ادامعا اس بەرىلدى.
