قازاقستان "قىمباتشىلىق جاعىنان" تمد-دا كوش باستادى

ءومىر ءسۇرۋ قۇنى بويىنشا دايىندالعان رەيتينگىندە قازاقستان رەسپۋبليكاسى 140 مەملەكەتتىڭ اراسىندا 91-ورىنعا يە بولىپ، "قىمباتتىعى" جاعىنان تمد-داعى ەلدەردى باسىپ وزدى، دەپ حابارلادى "ادىرنا" ۇلتتىق پورتالى Finprom.kz-كە سىلتەمە كورسەتە وتىرىپ.   

بيىل ءبىرىنشى توقسان قورىتىندىسى بويىنشا ءومىر ءسۇرۋ قۇنى رەيتينگىسىندە قازاقستان 91-ورىنعا تۇراقتادى. ەلىمىزدىڭ يندەكسى – 25,4. يندەكس تۇتىنۋ تاۋارلارى مەن جالعا بەرىلەتىن تۇرعىن ءۇي قۇنىن نيۋ-يورك قالاسىمەن سالىستىرا وتىرىپ باعالانادى. تمد ەلدەرىنىڭ ىشىندە قازاقستان ەڭ قىمبات مەملەكەتتىك ءبىرى اتاندى. تىزىمدە ارمەنيا – 57 ورىندا، بەلارۋس – 98, مولدوۆا 101, رەسەي –110, قىرعىزستان – 111, ازەربايجان – 119, وزبەكستان 125-ورىندا تۇر.

الدىڭعى ورىندارعا بەرمۋد جانە كايمان ارالدارى جايعاسسا، رەيتينگتىڭ سوڭىندا پاكىستان تۇر. بيىل شىلدەنىڭ قورىتىندىسى بويىنشا قازاقستاندا تاۋارلار مەن قىزمەتتەردىڭ باعاسى – 0,6%، جىل باسىنان بەرى – 5,8% جانە ءبىر جىلدا 14%-عا ءوستى. بيىل قاڭتار–شىلدەدە باعانىڭ ءوسۋى (2022 جىلعى قاڭتار–شىلدەمەن سالىستىرعاندا) 17,2% بولدى. وڭىرلەر بويىنشا اي سايىنعى ديناميكادا باعانىڭ ەڭ كوپ ءوسىمى ۇلىتاۋ وبلىسىندا (1%), قاراعاندى جانە قىزىلوردا وبلىستارىندا، استانا جانە الماتى قالالارىندا (ارقايسىسىندا 0,8%) تىركەلدى. جىلدىق ديناميكا بويىنشا تاۋارلار مەن قىزمەتتەر باعاسىنىڭ ەڭ ۇلكەن ءوسىمى تاعى دا ۇلىتاۋ وبلىسى جانە سولتۇستىك قازاقستان وبلىستارى جانە استانا قالاسىندا (ارقايسىسىندا 15,4%), ال ەڭ ازى اتىراۋ وبلىسىندا (11,8%) بايقالدى.

• بيىل قاڭتار–شىلدە ايلارىنىڭ قورىتىندىسى بويىنشا باعانىڭ ەڭ كوپ ءوسىمى – ماڭعىستاۋ وبلىسىندا (19,5%), ەڭ ازى – الماتى وبلىسىندا (15,7%).
• اي سايىنعى ديناميكا بويىنشا، ازىق-تۇلىك تاۋارلارى – 0,1%، ازىق-تۇلىك ەمەس تاۋارلار – 0,7%، اقىلى قىزمەتتەر – 1% قىمباتتادى.
• جىلدىق ديناميكا بويىنشا ازىق-تۇلىك تاۋارلارى – 13,5%، ازىق-تۇلىك ەمەس تاۋارلار – 15%، اقىلى قىزمەتتەر – 13,6% قىمباتتادى.
• قاڭتار-شىلدەنىڭ قورىتىندىسى بويىنشا ازىق-تۇلىك تاۋارلارىنىڭ باعاسى – 19%، ازىق-تۇلىك ەمەس تاۋارلاردىڭ باعاسى — 17,8%، اقىلى قىزمەتتەردىڭ باعاسى 13,9% قىمباتتادى.
• ازىق-تۇلىك جانە الكوگولسىز سۋسىندار ءبىر جىلدا 13,3% قىمباتتادى ء(بىر ايدا ءوسىم بايقالمادى).
• كيىم جانە اياق كيىم ءبىر ايدا – 0,7%، ءبىر جىلدا – 15,2%، تۇرعىن ءۇي قىزمەتتەرى، سۋ، ەلەكتر ەنەرگياسى، گاز جانە باسقا دا وتىن تۇرلەرى ءبىر ايدا – 1%، ءبىر جىلدا – 14,9%;
• دەنساۋلىق ساقتاۋ قىزمەتتەرى ءبىر ايدا – 1%، ءبىر جىلدا – 17,5%; دەمالىس جانە مادەنيەت قىزمەتتەرى ءبىر ايدا – 3,6%، ءبىر جىلدا –16%;
• ءبىلىم بەرۋ قىزمەتتەرى ءبىر ايدا – 0,2%، ءبىر جىلدا – 13%;
• مەيرامحانالار مەن قوناقۇيلەر ءبىر ايدا – 0,5%، ءبىر جىلدا – 15,3% قىمباتتادى.

"ادىرنا" ۇلتتىق پورتالى