بۇگىن قالا اكىمى م. ايتەنوۆ وزبەكستاننىڭ قازاقستانداعى توتەنشە جانە وكىلەتتى ەلشىسى س. نيازحودجاەۆتى قابىلدادى. تاراپتار الداعى ۋاقىتتا تۋريزم، ساۋدا-ساتتىق، ونەركاسىپ، مادەنيەت سالالارىندا ەكى جاققا دا ءتيىمدى بولاتىن ماڭىزدى جوبالاردى تالقىلادى. م.دۇيسەنبەكۇلى تاشكەنتتىڭ تۋريست تارتۋداعى وڭدى تاجىريبەسىنىڭ تيىمدىلىگىن اتاپ ءوتىپ، بولاشاقتا مەگاپوليستىڭ تۋريزم باعىتىن دامىتۋدا ارىپتەستىك بايلانىس ورناتۋعا دايىن ەكەنىن جەتكىزدى.
شىمكەنت-تاشكەنت باعىتتارىنداعى كورىكتى ورىندار بويىنشا جاڭا تۋريستىك باعىتتاردى جولعا قويۋدى ۇسىندى. وزبەكستان تاراپى شىمكەنتتىك دەلەگاتسيانى الداعى ۋاقىتتا تاشكەنت قالاسىندا وتەتىن حالىقارالىق قولونەرشىلەر كورمەسىنە شاقىردى.
بۇگىندە قازاقستان مەن وزبەكستان اراسىنداعى ەكونوميكالىق ىنتىماقتاستىق قارقىندى دامىپ كەلەدى. ەكىجاقتى ىنتىماقتاستىقتىڭ ماڭىزدى سالاسى ءوزارا ساۋدا-ساتتىق بولىپ تابىلادى.
ەلىمىزدىڭ نەگىزگى ەكسپورتتىق ونىمدەرى - ازىق-تۇلىك تاۋارلارى، مەتالدار، ەنەرگيا تاسىمالداۋشىلار، ءىرى قارا مال، مۇناي ونىمدەرى، حيميالىق ونىمدەر جانە قۇرىلىس ماتەريالدارى بولىپ تابىلادى. وزبەكستان قازاقستانعا جەمىس-كوكونىس ونىمدەرىن، توقىما بۇيىمدارىن، قارا جانە ءتۇستى مەتالداردى، ماشينالاردى، حيميالىق ونىمدەر مەن قۇرىلىس ماتەريالدارىن جەتكىزەدى.
تاراپتار اراسىندا كولىك سالاسىنداعى ىنتىماقتاستىق تا كەڭەيىپ كەلەدى. بۇل ءوز كەزەگىندە تۋريستىك سالاداعى بايلانىستىڭ جاڭا پەرسپەكتيۆالارىنا جول اشادى. جالپى، ساۋدا-ەكونوميكالىق ىنتىماقتاستىقتى ودان ءارى دامىتۋدا دا جاڭا باستامالار بار.
باسقا ماتەريالدار
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز