اەس قۇرىلىسى. ۇلكەن اۋىلى تۇرعىندارى ستانتسيا قۇرىلىسىن قولدادى

22 تامىز كۇنى الماتى وبلىسى، جامبىل اۋدانى، ۇلكەن اۋىلىندا اتوم ەلەكتر ستانتسياسىنىڭ قۇرىلىسىنا قاتىستى جاريا تىڭداۋ ءوتتى. جيىن ۇلكەن اۋىلى ورتا مەكتەبىنىڭ اكت زالىندا 300-گە جۋىق ادامنىڭ قاتىسۋىمەن ءوتتى. قۇرىلىس ماسەلەسىنىڭ جاي-جاپسارىن ءتۇسىندىرىپ قر ەنەرگەتيكا مينيسترلىگى، «قازاقستان اتوم ەلەكتر ستانتسيالارى» جشس، «يادرولىق فيزيكا ينستيتۋتى» رمك جانە ت.ب. مەكەمە ماماندارى ءسوز سويلەدى. ساراپشىلار اتوم ەلەكتر ستانتسيالارىنىڭ قورشاعان ورتاعا، ەكولوگياعا، ەلىمازدەگى سۋ رەسۋرستارىنا اسەرى تۋرالى ەگجەي-تەگجەيلى ايتىپ بەردى. سونداي-اق اەس-ءتىڭ تەحنيكالىق اسپەكتىلەرى، اتوم ەلەكتر ستانتسياسىن سالۋ كەزىندە ايماقتىڭ دامۋ پەرسپەكتيۆالارى قاراستىرىلدى.

“جاريا تىڭداۋ جەرگىلىكتى وكىلەتتى ورگانمەن ۇيىمداستىرىلىپ وتىر. قر زاڭى بويىنشا قازاقستان رەسپۋبليكاسىندا اەس سالۋ ورنى قر ۇكىمەتى شەشىمىمەن قابىلدانادى. الايدا وسى شەشىم تەك قانا جەرگىلىكتى وكىلەتتى ورگاننىڭ شەشىمى بويىنشا قاراستىرىلادى. سول سەبەپتەن دە وسى جيىندا باس قوسىپ وتىرمىز. حالىق پىكىرى ەشقاشان ەلەنبەي قالمايدى. بارلىعىنىڭ سۇراقتارىنا جاۋاپ بەرىلىپ، پىكىرلەرى ەسكەرىلەتىن بولادى”،— دەپ جاۋاپ بەردى ەنەرگەتيكا مينيسترلىگىنىڭ اتوم ەنەرگەتيكاسى جانە ونەركاسىپ دەپارتامەنتى ديرەكتورىنىڭ ورىنباسارى گۇلميرا مۇرسالوۆا.

جيىن بارىسىندا تەك قۇرىلىس بارىسى ءتۇسىندىرىلىپ قويماي، اۋىل تۇرعىندارى مەن جيىنعا كەلگەن قاتىسۋشىلاردىڭ چۇراشتارى نازارعا الىنىپ، ماماندار تاراپىنان جاۋاپتار بەرىلدى. ۇلكەن اۋىلىنىڭ تۇرعىندارى اەس قۇرىلىسى جوباسىن قولدايتىندىقتارىن ءبىلدىردى.

“وسى اۋىلدا تۋىلىپ، وسى اۋىلدا ءبىلىم الىپ، ءالى كۇنگە دەيىن نانى مەن سۋىن ءىشىپ كەلەمىز. ءوزىم وسىندا مەديتسينا قىزمەتكەرى بولىپ جۇمىس جاسايمىن. بۇل جاقتاعى ماسەلەلەردى بىلەتىن ءبىز عانا. “اەس كەرەك ەمەس” دەپ وتىرعاندار ءبىزدىڭ قالاي سۋسىز، جارىقسىز قينالاتىنىمىزدى بىلمەيدى. اي سايىن جارىق ءوشىپ، ۋاقىت-ۋاقىتىمەن سۋ بەرىلەتىنى جەرگىلىكتى تۇرعىنداردىڭ عانا ماسەلەسى. ال اەس سالىنسا ەنەرگيا تاپشىلىعى ماسەلەسى ەكى باستان شەشىلىپ، ءبىزدىڭ اۋىل ناعىز پەرسپەكتيۆاعا اينالار ەدى. سوندىقتان ءبىز قوس قولداپ قولدايمىز. زيان دەپ قورقاتىن جاندار بۇل تاقىرىپتى تۇسىنبەيتىندەر جانە تۇسىنگىسى كەلمەيتىندەر. ءبىز - دارىگەرلەر بۇل ماسەلەنى باياعىدا زەرتتەپ قويعانبىز. زيان تۇگى دە جوق. كەرىسىنشى بۇل قۇرىلىس بۇدان ەرتە سالىنسا ءتىپتى كەرەمەت بولار ەدى”،—دەدى اۋىل تۇرعىنى فاريزا تولەگەنوۆا.

سونداي-اق، مەكتەپ زالىندا "قازاقستاندىق اتوم ەلەكتر ستانتسيالارى" جشس باس ديرەكتورى تيمۋر جانتيكين ۇلكەن اۋىلى ون اۋداننىڭ اراسىنان تاڭدالعانىن ايتتى:

"اتوم ەلەكتر ستانتسياسىن سالۋ ءۇشىن ەكى اۋماق زەرتتەلدى، ولار قازاقستاننىڭ شىعىسى جانە وڭتۇستىگىندە. ەكى اۋماق تا اتوم وبەكتىلەرىن سالۋعا جارامدى. ءبىزدىڭ كومپانيا يادرولىق تەحنولوگيالار قاۋىپسىزدىگى ورتالىعىنىڭ ماماندارىن تارتا وتىرىپ زەرتتەۋلەر جۇرگىزدى. تەحنيكالىق جانە ەكولوگيالىق ساراپتامالار جۇرگىزىلدى. ياعني، بارلىق زەرتتەۋ ناتيجەلەرى راستالدى. ءبىزدىڭ كومپانيا وڭتۇستىك قازاقستاندى ۇسىندى. سوندىقتان ءبىز وسىندا جينالىپ، تۇرعىنداردىڭ پىكىرلەرىن تىڭداعىمىز كەلدى»، - دەدى تيمۋر جانتيكين.

جيىندا اۋىل تۇرعىندارى اەس قۇرىلىسىن قولداپ، ءوز ۇستانىمدارىن كورسەتتى. جاريا تىڭداۋ قورىتىندىسى بويىنشا الماتى وبلىسىنىڭ ءماسليحاتى شەشىم شىعارادى، سودان كەيىن ماسەلەنى ۇكىمەت قاراستىرادى.