قازاقستان پرەزيدەنتى قاسىم-جومارت توقاەۆ استانادا باستالعان تاجىكستاننىڭ كورمە-جارمەڭكەسىندە قولونەرشىنىڭ ۇسىنعان سىيلىعىن تەگىن الۋدان باس تارتتى. بۇل تۋرالى اقوردانىڭ Telegram-ارناسى جاريالادى، دەپ حابارلايدى “ادىرنا” ۇلتتىق پورتالى.
كەزدەسۋ بارىسىندا توقاەۆ پەن راحمون تاجىكستاننىڭ اۋىل شارۋاشىلىعى جانە ونەركاسىپ تاۋارلارىمەن تانىسىپ، پالاۋدىڭ دا ءدامىن كوردى.
كورمە كەزىندە تاجىك قولونەرشىسى قازاقستان پرەزيدەنتىنە بىلعارىدان جاسالعان اميانعا ۇقساس بۇيىمدى سىيعا تارتتى. الايدا توقاەۆ ونى تەگىن الۋدان باس تارتتى.
مەن ەشقاشان تەگىن المايمىن. قازاقستانداعى كورمەلەر كەزىندە دە بارلىعىنا
اقشا تولەيمىن، - دەدى توقاەۆ.
ايتا كەتەيىك، تاجىكستان پرەزيدەنت ەمومالي راحمون قازاقستاندا جۇمىس ساپارىمەن كەلدى. بۇگىن ەكى ەلدىڭ پرەزيدەنتتەرى استاناداعى جاڭا مەشىتكە باردى. ال جارمەڭكەدەن كەيىن راحمونعا تسيفرلىق ۇكىمەت كەڭسەسى تانىستىرىلدى. كەزدەسۋ كەزىندە ءوزارا تۇسىنىستىك تۋرالى مەموراندۋمعا قول قويىلدى. بۇل قۇجات اياسىندا قازاقستاننىڭ تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى تاجىكستاننىڭ ونەركاسىپ جانە جاڭا تەحنولوگيالار مينيسترلىگىمەن ەلەكتروندىق ۇكىمەت پلاتفورماسىن جۇزەگە اسىرۋ تاجىريبەسىن بولىسەدى.
