بۇگىن اقپارات جانە قوعامدىق دامۋ ءمينيسترى اقمولا وبلىسىنىڭ زەرەندى اۋدانىندا “جاستار اكادەمياسى” اياسىندا ءوتىپ جاتقان “ادىلەتتى قازاقستان - ادال ازامات” ديالوگتىق الاڭىنا قاتىستى.
اتالعان ءىس-شاراعا قازاقستاننىڭ بارلىق وڭىرىنەن كەلگەن 100-دەن استام جاستار قىزمەتكەرلەرى ءۇش كۇن ىشىندە ءتۇرلى ترەنينگتەرگە قاتىسىپ، ءوزارا تاجىريبە الماستى. بۇل تۋرالى دارحان قىدىرالى ءوزىنىڭ پاراقشاسىندا جازدى.
ءىس-شارا اياسىندا وتكەن “ادىلەتتى قازاقستان - ادال ازامات” اتتى جيىندا مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباەۆ، اقمولا وبلىسى اكىمىنىڭ ءبىرىنشى ورىنباسارى ەلدوس رامازانوۆ، “Amanat” پارتياسىنىڭ اتقارۋشى حاتشىسى داۋلەت كارىبەك تە ءسوز سويلەپ، جاستارعا پايدالى اقپاراتتار بەردى.
“وزدەرىڭىزگە بەلگىلى، مەملەكەت باسشىسى تۇركىستانداعى ۇلتتىق قۇرىلتايدا جاستارىمىز تۋعان جەردىڭ ەشكىمگە ۇقسامايتىن ەرەكشەلىگى مەن بىرەگەي بولمىسىن جەر جۇزىنە تانىتىپ جۇرگەنىن ەرەكشە اتاپ وتكەنى بەلگىلى. سونىمەن قاتار «جاس ۇرپاق تاريح تاعىلىمىن جانە ەلدىڭ جارقىن بولاشاققا ۇمتىلىسىن ءبىر ارناعا توعىستىرىپ جاتىر. وسى سەرپىلىستىڭ قارقىنىن ساقتاي وتىرىپ، ونى كۇشەيتە ءتۇسۋ – مەملەكەتتىڭ مىندەتى» دەگەن ەدى”، - دەپ جازدى مينيستر.
بيىل «مەملەكەتتىك جاستار ساياساتى تۋرالى» زاڭ ءوز كۇشىنە ەندى. جاستار ساناتى 35 جاسقا دەيىن ۇلعايدى. قازىر ولاردىڭ سانى 6 ملن-عا ءوستى. زاڭدى ىسكە اسىرۋ ءۇشىن، 7 باعىت جانە 80 ءىس-شارالار كەشەنىنە قولجەتكىزۋدى كوزدەيتىن 2029 جىلعا دەيىن ارنالعان مەملەكەتتىك جاستار ساياساتىنىڭ تۇجىرىمداماسى قابىلداندى.
اقپارات جانە قوعامدىق دامۋ ءمينيسترى “پارلامەنت ءماجىلىسى مەن ءماسليحاتتاردا جاستار، ايەلدەر جانە مۇگەدەكتىگى بار ادامدار ءۇشىن 30% كۆوتا ەنگىزىلدى جانە بارلىق دەڭگەيدەگى قوعامدىق كەڭەستەردە جاستار ءۇشىن 20% كۆوتا ەنگىزۋ جوسپارلانۋدا. بۇنىڭ بارلىعى مەملەكەت باسشىسىنىڭ قامقورلىعىمەن جاستارعا دەگەن قامقورلىعى دەپ تۇسىنگەن ابزال” دەدى.
وكىنىشكە وراي، جاستار اراسىنداعى ءولىم مەن سۋيتسيد جيىلەپ تۇر. سول سەكىلدى جاستاردىڭ زاڭ بۇزۋى، ناشاقورلىق، قارجى جونىنەن ساۋاتتىڭ از بولۋى، جۇمىسسىزدىق ماسەلەسى بار. بۇل ماسەلەلەردى شەشۋ ءۇشىن ناقتى جۇمىستار اتقارىلىپ جاتىر.
جاقىن ارادا جاستارمەن جۇمىس جونىندەگى ماماندارعا ارنالعان كاسىبي ستاندارتتار قابىلداندى. بۇل جۇمىستى جۇيەلەۋگە جانە جرو قىزمەتكەرلەرىن ىرىكتەۋدىڭ ناقتى ولشەمدەرىن انىقتاۋعا مۇمكىندىك بەرەدى.
قازىر جاستارعا ارنالعان بىرىڭعاي ينتەراكتيۆتى اقپاراتتىق-تسيفرلىق پلاتفورما قۇرۋ جوسپارلانىپ وتىر. پلاتفورمالار ارقىلى جاستاردى قولداۋدىڭ بارلىق مەملەكەتتىك شارالارى تۋرالى بىلۋگە جانە بەلسەندى قاتىسۋعا مۇمكىندىك بار. پلاتفورمادا مەملەكەتتىك باعدارلامالار مەن جوبالارعا قاتىسۋدىڭ ناقتى الگوريتمدەرى جازىلاتىن بولادى.
مينيستر سوڭعى جىلدارى ەلىمىزدە كرەاتيۆتى يندۋستريا قارقىندى دامىپ كەلەدى. تالانتتى جاستارىمىز ءارتۇرلى سالادا جارقىراپ كورىنىپ، جەمىستى ەڭبەك ەتۋدە. مەملەكەت باسشىسى دا كرەاتيۆتى يندۋستريا سالاسىنا ءجىتى كوڭىل ءبولۋ كەرەك ەكەنىن اتاپ وتكەن ەدى. سوندىقتان بيىل مەملەكەتتىك «دارىن» جاستار سىيلىعىنا العاش رەت «كرەاتيۆتى قىزمەت» نوميناتسياسى قوسىلىپ وتىرعانىن اتاپ ءوتتى.
ديالوگتىق الاڭ سوڭىندا جاستار كوكەيىندەگى سۇراقتارىن قويىپ، جاستار ورتالىقتارىن كادرلىق دايارلاۋدان وتكىزۋ سىندى ۇسىنىستار جاسادى.
(س) قر اقدم ءباسپاسوز قىزمەتى
"ادىرنا" ۇلتتىق پورتالى
