قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ 45 جاسقا تولدى، دەپ حابارلايدى "ادىرنا" ۇلتتىق پورتالى.
ولجاس بەكتەنوۆ 1980 جىلى الماتى قالاسىندا دۇنيەگە كەلگەن. 2001 جىلى قازاق مەملەكەتتىك زاڭ اكادەمياسىن زاڭگەر ماماندىعى بويىنشا تامامداعان. ەڭبەك جولىن 2002 جىلى الماتى قالاسى ادىلەت باسقارماسىندا ءبولىمنىڭ باس مامانى رەتىندە باستاعان.
ولجاس بەكتەنوۆ پرەمەر-مينيستر قىزمەتىنە 44 جاسىندا تاعايىندالعان.
ايتا كەتەيىك، قازاقستاننىڭ تۇڭعىش پرەزيدەنتى نۇرسۇلتان نازارباەۆ تا 44 جاسىندا قازاق سسر مينيسترلەر كەڭەسىنىڭ توراعاسى بولىپ تاعايىندالعان.
ءار جىلدارى قر پرەمەر-ءمينيسترى كەڭسەسىندە، قر پرەزيدەنتىنىڭ اكىمشىلىگىندە جاۋاپتى قىزمەتتەر اتقاردى. 2009–2012 جىلدارى ادىلەت مينيسترلىگىنىڭ تىركەۋ قىزمەتى جانە قۇقىقتىق كومەك كورسەتۋ كوميتەتى توراعاسىنىڭ ورىنباسارى بولدى. كەيىن ەكونوميكالىق قىلمىسقا جانە سىبايلاس جەمقورلىققا قارسى اگەنتتىكتىڭ ورتالىق اپپاراتىندا دەپارتامەنتتى باسقاردى.
2015–2016 جىلدارى استانا قالاسى اكىمىنىڭ اپپارات باسشىسى، سونداي-اق قر پرەزيدەنتى اكىمشىلىگى باسشىسى حاتشىلىعىنىڭ مەڭگەرۋشىسى قىزمەتتەرىن اتقاردى. 2016–2017 جىلدارى سىبايلاس جەمقورلىققا قارسى قىزمەتتىڭ استانا قالاسى بويىنشا دەپارتامەنتىن باسقاردى.
2017–2018 جىلدارى اقمولا وبلىسى اكىمىنىڭ ورىنباسارى بولدى. ودان كەيىن قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى، 2019–2022 جىلدارى سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ءبىرىنشى ورىنباسارى قىزمەتتەرىن اتقاردى.
2022 جىلدىڭ اقپانىنان 2023 جىلدىڭ ساۋىرىنە دەيىن سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى بولدى. 2023 جىلعى 3 ساۋىردە مەملەكەت باسشىسىنىڭ جارلىعىمەن قر پرەزيدەنتى اكىمشىلىگىنىڭ باسشىسى بولىپ تاعايىندالدى. ال 2024 جىلعى 6 اقپاندا قر پرەزيدەنتىنىڭ جارلىعىمەن قازاقستان رەسپۋبليكاسىنىڭ پرەمەر-ءمينيسترى قىزمەتىنە كىرىستى.
ولجاس بەكتەنوۆ ءىى دارەجەلى «ايبىن» (2014) جانە «داڭق» (2021) وردەندەرىمەن ماراپاتتالعان.
